Deklaratat me gjuhë diskriminuese në mediat shqiptare vijojnë të ngjallin reagime. Së fundmi, një incident u bë publik në emisionin Ferma VIP, ku moderatorja Arbana Osmani përdori një shprehje me konotacion fyes ndaj një konkurrenti.
Në një intervistë për Piranjat News, zv.ministrja e Kulturës dhe Integrimit, Majko, e cilësoi fenomenin si shqetësues dhe të përsëritur, duke paralajmëruar se institucionet e AMA-s do të veprojnë përmes një kërkese zyrtare.
“Absolutisht që ndikojnë. Çdo njeri ka të drejtë të quhet ashtu siç dëshiron të quhet. Ne quhemi romë dhe jo me epitete që kanë konotacion përçmues. Kur njerëzit nuk e kuptojnë këtë, duhet të vendosen përpara përgjegjësisë,” tha Majko, duke theksuar ndikimin negativ që këto deklarata kanë te paragjykimi ndaj komunitetit rom.
Zv.ministrja apeloi për më shumë përgjegjësi nga mediat dhe figurat publike, duke theksuar se ndryshimi i mentalitetit kërkon kohë dhe ndërgjegjësim të vazhdueshëm.
