Pushtetarët shqiptarë dhe bosët e krimit kanë nxjerr jashtë vendit me miliona euro. Çdo vit në raportet ndërkombëtare shihet si shqetësim pastrimi i parave, por vitet e fundit ka pasur rritje të ndjeshme të transfertave në shtete të ndryshme të botës.
Por sa herë që flitet për pastrim parash në politikën shqiptare, del në skenë emri i Ilir Metës. Një mesazh i koduar ka ardhur së fundmi nga ish-zv.kryeministri, Erion Braçe për ish-presidentin. Ai ka ironizuar deklaratën e kryetarit të Partisë së Lirisë, Ilir Meta, i cili ka dalë kundër propozimit të qeverisë për “pasaportat e arta”.
Nisur nga deklarata e ish-presidentit, Braçe shkruan se paratë e depozituara jashtë shtetit e që janë bërë prona këtu, duhen sekuestruar, po një gjë e tillë duhet të nisë nga Londra e Qipro, dy vende për të cilat ish-kreu i shtetit është akuzuar për pastrim parash. “I.M ka shumë të drejtë; Paratë depozituar jashtë, bërë prona të patundshme apo që kane krijuar emigrantë depozita, duhen sekuestruar!
Ta fillojmë nga Londra e Qipro them unë! Pastaj vijojmë me lekët e pronat këtu”, shkruan Braçe. Ky është një mesazh i fuqishëm nga një ish-zv.kryeministër për Metën, se këto dy vende mund të fshehin pasuri të ish-presidentit. Gazeta “Sot” raportoi pak ditë më parë se Londra ka nisur gjuetinë e parave të pista dhe nën shënjestër janë shumë politikanë shqiptarë dhe nuk mund të përjashtohet se Ilir Meta mund të kalojë në sitë.
A i kanë sekuestruar 400 milionë paund në Londër ish-presidentit?
Por pse po përmendim Ilir Metën dhe Monika Kryemadhin për paratë e pista dhe çfarë i lidh ata me Londrën? Nëse bëjmë një analizë të situatës, në deklarimin që Meta e Kryemadhi kanë bërë pranë ILDKP, bie në sy se kanë disa llogari edhe fëmijët e tyre, shumica të hapura për qëllime studimi. Vetëm në vitet e fundit është deklaruar se janë shpenzuar 140 mijë paund për shkollimin e tyre në Londër.
Ky destinacion mbetet i preferuar për familjen e Kryemadhit, pasi edhe vëllai i saj, Drini ndodhet sa mes Tiranës edhe Anglisë. Lëvizje të cilat ngrenë shumë pikëpyetje, pasi ka informacione se nga Londra, do të dalë emri i një politikani shumë të njohur në Shqipëri, të cilit i kanë piketuar pasuri marramendëse, e së shpejti do të bllokohen dhe do të zbardhen të gjitha gjurmët e tij në paratë e krimit të organizuar dhe të korrupsionit.
Zyrtarët e lartë në Shqipëri janë përpjekur të tregohen të zgjuar duke pastruar para nëpërmjet personave të tjerë të rrethit të tyre familjar, por britanikëve nuk do të mund t’ua hedhin dot, pasi politikani shqiptar është kapur “mat” duke përdorur skemën e sipërpërmendur, duke përdorur njerëzit e tij më të ngushtë për t’ju fshehur drejtësisë. Investimet e tij në Londër, kanë rënë në sy dhe në kuadër të hetimeve të thelluara në ditët në vijim, pritet që të gjithë pasurinë prej 400 milonë paundësh t’ia vënë nën sekuestro.
Si përfundim, a është presidenti Meta, politikani që shërbimet inteligjence britanike i kanë bllokuar pasuri marramendëse në Londër? Mbetet të shihet se çfarë do të zbulojnë institucionet e huaja pasi, edhe pse shumë pushtetarë shqiptarë janë zhytur në korrupsion dhe të gjithë ia kanë hedhur paq, shpresat janë se diçka do ndryshojë përmes SPAK dhe BKH, të cilët po bashkëpunojnë ngushtë edhe me institucionet ndërkombëtare.
