Presidenti i Turqisë Recep Tayyip Erdogan deklaroi pas tërmetit të 26 nëntorit se qeveria turke do të ndërtojë në Shqipëri 500 banesa për t’i ardhur në ndihmë të prekurve nga tërmeti. Shteti turk ka vendosur që këto 500 banesa t’i ndërtojë në zonën e Laçit dhe të Thumanës.
Sakaq është bërë me dije se procesi i ndërtimit të këtyre banesave do të ketë përfunduar brenda muajt korrik, duke bërë të mundur kësisoj strehimin e banorëve në këto banesa në muajin korrik. Ministri për Rindërtimin Arben Ahmetaj gjatë një konference me ministrin turk të Mjedisit dhe Urbanizimit, Murat Kurum tha se projekti përbën risi nga ana teknologjike dhe shkon përtej ndërtimit të emergjencës. “Puna për rindërtimin ka filluar. Projekti mendohet të jetë rreth 500 banesa për qytetarët që kanë humbur shtëpitë në zonën e Thumanës dhe Laçit, shoqëruar me ambiente komerciale dhe dy ambiente të rëndësishme publike. Jemi duke folur për shkollën dhe ndërtesën e Bashkisë së Thumanës”, ka deklaruar ministri për Rindërtimin.
Më tej mbajti fjalën e tij edhe ministri Murat Kurum, i cili gjatë deklaratës së tij për shtyp theksoi se vendi ynë ka qenë gjithnjë në vëmendjen dhe në fokusin e Turqisë dhe të presidentit turk Erdogan. Kurum deklaroi se ndërtimi i banesave është një detyrë ndaj vëllezërve shqiptarë. “U munduam të ishim krah vëllezërve shqiptarë. Kemi ofruar ndihma, jemi mundur të përballojmë nevojat për çadra dhe ushqime.
Përveç kërkesave urgjente presidenti Erdogan për të plotësuar nevojat për strehim ka premtuar ndërtimin e 500 banesave. Ne e kemi filluar menjëherë këtë proces. Banesat do të përshtaten me kulturën tuaj të jetesës dhe synojmë t`i përfundojmë brenda 6 muajsh”, ka deklaruar dje ministri turk Kurum. Synimi i qeverisë është që brenda vitit të ri 2020 të ketë përfunduar i gjithë rikonstruksioni dhe ndërtimi i të gjitha banesave që u prekën nga tërmeti. Ky rindërtim konsiston si në zonat rurale ashtu dhe në ato urbane, sakaq qeveria synon që të rregullojë edhe dëmtimet në shkolla e qendra shëndetësore. Procesi i rindërtimit pritet të përfundojë pranverën e vitit 2021 me krijimin e lagjeve të reja urbane në Tiranë, Durrës, Kavajë, Krujë e Thumanë. Sipas të dhënave zyrtare dimrin po e kalojnë në çadra 10 mijë persona.
