Reportazhi i zonjës Karo për SHQUP-in ishte një eksperiencë e re për Mulin. Ai pati rastin t’u tregonte demokratëve ambientet e SHQUP-it: zyrat pa fund, në tre kate, taracat, tualetet etj.
Pati shumë mesazhe nga populli që e uronin.
Thirri Lelon të merrte përshtypjet e tij si më specialist.
•Nuk e di – tha Lelo – por duhet të ishte përgatitur më mirë si emision. Se dukej sikur SHQUP-i kishte dalë në shitje dhe zonja Karo ngjante si agjente imobiliare nga ato që thonë: “tani e keni me letra”, “me vulë”, “shikojeni sa i mirë, sa i madh është”. Dhe kjo ka krijuar keqkuptime.
•Pse, kanë menduar se po e shesim SHQUP-in? – tha Muli.
•Ashtu dukej – tha Lelo. Meqë është hapur edhe fjala që këtu janë planifikuar tre kulla, dukej sikur po kërkonim përqindje më të lartë. Ndaj thashë që duhej përgatitur më mirë.
•Po çfarë mund të bënte më mirë?
•Po ja, së pari duhet të tregohej beteja për marrjen e SHQUP-it më 8 Janar 2022. Ajo ka qenë betejë vendimtare. Zonja Karo duhej të tregonte gjurmët e luftës, dyert e blinduara, shenjat e mbetura në taracë nga bombat tymuese, ndonjë varë apo çysqi që ka mbetur nga ajo betejë. Pra, duhet të krijonim një lloj muzeu të luftës në SHQUP që t’u tregonim brezave se e kemi fituar me gjak SHQUP-in nga Lul Basha.
•Po atë s’e bëjmë dot, se të gjithë ata që kishim përballë më 8 Janar i kemi sot në krye të partisë tani – tha Muli.
•Nuk ka rëndësi – tha Lelo. Proces reflektimi është dhe për ata. Historia duhet shkruar si ka qenë. Të paktën, me këtë rast, kandidati duhej zgjedhur nga ata që sulmuan, jo nga ata që e mbronin SHQUP-in nga Doktori.
•Po tjetër çfarë mungonte? – i tha Muli.
•Mungonte edhe historia e vjetër e SHQUP-it si Pallat i Kulturës së Oficerëve, ku ishte çerdhja e propagandës së PPSH. Dhe simbolika është e bukur: nga vatër e neverisë në vatër të trumpizmit. Dhe ilustrohej ajo me foto, fjala vjen foto e Gim Neshos në bllok gjatë komunizmit, dhe si trumpist tani në SHQUP. Këto do ta pasuronin edhe më shumë. Por, nuk ka dalë keq dhe ashtu. Vetëm kjo ideja që ajo po e prezantonte për ta shitur ka ngjitur shumë.
