Një letër ka mbërritur sot në selinë e SHQUP. Muli thirri Lelon me urgjencë ngaqë nuk kupton anglisht.
– Është letër nga Brazili, tha. Me siguri është për Doktorin si zëvendëspresident.
Lelo i hodhi një sy të shpejtë.
– Po andej është, tha. Qenka Jeao Karlo Amazona, – tha Lelo. – Ja të lexojmë.
“I nderuar zoti Berisha.
Pashë lajmet në TV dhe mësova se ju keni qenë në një mbledhje partie në Brazil. Sapo dëgjoj fjalën Shqipëri unë mallëngjehem pasi unë trashëgoj emrin e babit tim Jeao Amazona dhe të gjyshit tim Karl.
Jam shumë i interesuar të di për Shqipërinë dhe jetën tuaj si politikan pasi më dukeni moshë e babait tim i cili ka vdekur më 2020.
Ai ka jetuar në ilegalitet në Shqipëri kur fraksionistët maoistë deshën ta rrëzonin nga pushteti, por ai e bëri Kongresin në Sarandë në një vend me palma dhe u transmetua në Brazil sikur u bë në xhungël duke i shpartalluar fraksionistët maoistë.
Me sa kuptova edhe ju keni probleme me fraksione brenda partisë si dhe me vendet e mëdha kapitaliste si SHBA ku ju paskan shpallur non grata.
E ndjej detyrë timen familjare t’ju dal në krah në këto ditë të vështira dhe nëse doni të qëndroni në Brazil, shtëpinë tonë e keni të hapur. Ne po ashtu do luftojmë të shkatërrojmë gjithë armiqtë tuaj të brendshëm për të respektuar atë që ju si komunistë bëtë për babain tim në vitet ’70.
Me respekt,
Jeao Karlo Amazona.”
– Çfarë është ky? – tha Muli.
– Qenka djali i Jeao Amazonës, tha Lelo, ka pas qenë kryetar i Partisë Komuniste të Brazilit. Por e di Doktorin komunist! T’i dërgojmë një letër e ta sqarojmë që Doktori është antikomunist dhe pro SHBA, por SHBA ka qenë komuniste deri më 2024 ashtu siç është BE sot.
– Lëre, tha Muli, mos e ngacmo më tej këtë punë se e marrin vesh këta të CDI dhe na hapen probleme./Antena/Tema
