Pas konsultimeve me ish-ministrin Demiraj, i cili mban lidhjet mes Mulit dhe shefave të Deltaforcës në SHBA, sot u ra dakord që ato të zbarkojnë në datën 9 janar, kur qeveria do të jetë e mbledhur në Pallatin e Brigadave. Demiraj po i udhëzon drejtuesit e Deltaforcës se çfarë helikopteri duhet të përdorin në këtë rast. Ai ka sugjeruar helikopterë me helika të shkurtra, pasi vendi ku do ulen ka shumë pemë dhe mund të përplasen, duke dështuar.
Gjithashtu, ai u ka dërguar një skicë të Pallatit të Brigadave ku gjendet dhe Vila e Presidentit, duke e sqaruar që me të nuk kanë punë, se është ushtarak dhe mund t’u kundërpërgjigjet. Më tej, Demiraj ka dhënë hollësi dhe momentin kur do hyjnë në mbledhje qeveria, pasi ka qenë ministër i Ramës dhe e di mirë pozicionin e tij dhe rojet që ka tek dera.
Pasi lexoi me vëmendje planin e Demirajt në bashkëpunim me Deltaforcën, Muli i dha miratimin e plotë, por kërkoi që para se të ngriheshin, Deltaforca të bënte një foto me Klevisin tek oborri i Pallatit të Brigadave për të krijuar idenë se ai udhëhoqi operacionin tokësor.
Po ashtu, ka marrë masa që në momentin e uljes së helikopterëve në Tiranë të fiket sinjali telefonik, me qëllim që Tik Lapaj të mos marrë vesh gjë, dhe të vazhdojë protestën para qeverisë me shpresë që po rrëzohet Rama.
Pasi ia shpjegoi me detaje planin Lelos, ky i fundit e pa i çuditur. — Po ti pse nuk thua mor burrë se s’kam aq kohë që lodhem duke folur me Doktorin kur do ta lëmë mitingun që do rrëzojë Ramën.
— Mitingun do ta bëjmë — tha Muli, — por nuk do jetë miting i rrëzimit, por i fitores. Do të jetë si 23 marsi i 1992-shit. Do mbushim sheshin dhe Gëzim Neshaj do hapë mitingun duke deklaruar: “Ramaduro ua hoqi. Tani duromëni mua”.
