Pas seancës së sotme në Kuvend, Muli ishte shumë i zhgënjyer.
— Edhe një kërkesë që kishte opozita nuk na e plotësuan — tha Muli.
— Çfarë kërkese? — i tha Lelo.
— Kërkesa që Shqipëria të mos firmoste me emrin e Edi Ramës.
— Po me kë të firmoste? — tha Lelo.
— Të gjenin dikë tjetër. Dakord, Doktori nuk firmos dot se është “non grata”, por dikush nga opozita mund të gjendej.
— Lëre, iku ajo punë. Po çfarë t’u themi demokratëve tani? — tha Lelo.
— Duhet të nxjerrësh disa teza dhe t’i shpërndajmë — tha Muli.
— Kam bërë disa gati — tha Lelo. — Po t’i tregoj.
Teza e parë:
Edi Rama e ka blerë ftesën me 6 milionë dollarë. Por e ka blerë për të zezën e vet. Trumpi, sa e mori vesh që ia kanë futur ata të vetët se nuk i kanë treguar lekët, i tha të mos shkojë në Davos dhe thirri me urgjencë Osmanin.
— Të pëlqen?
— Shumë e mirë — tha Muli.
Teza e dytë:
Darka me Ivankën nuk ishte private. Presidenti Trump e porositi atë të mos hante drekë vetëm me Ramën dhe ajo porositi 100 mysafirë që të mos ishte vetëm me të. Kështu që ai nuk pati mundësi ta korruptonte.
— Shumë e bukur — tha Muli.
Teza e tretë:
Rama keqpërdori vajzën e Presidentit duke justifikuar mosshkuarjen në Davos me pritjen për vajzën e Presidentit. Ngaqë nuk arriti ta takonte kokë më kokë, ai bëri sikur kishte folur përmes saj me Trumpin. Kjo është nga ato deklarata me të cilat nuk merret Departamenti i Shtetit, por FBI-ja.
— E shkëlqyer — tha Muli.
Teza e fundit:
Rama ka hapur fjalë që do shkojë të firmosë në Shtëpinë e Bardhë. Kjo është gënjeshtër. Me këtë që ka bërë ai, Trumpi i ka thënë Ivankës: ose me mua, ose me Edi Ramën. Dhe ai s’ka më shans t’i japë dorën as Ivankës. Është klasifikuar si person që tenton të korruptojë familjen e Presidentit Trump!
— Kryevepër — tha Muli.
— Problemi është se kush na i boton këto — tha Lelo — se janë pak të çuditshme.
— I çan “Çim Peka” këto — tha Muli. — Për këta janë. Atë punë duhet: nuk duhen për popullin.
