“Jemi duke punuar për zgjidhje të reja, të shikojmë”.
Kështu u deklarua kryeministri Edi Rama për tërheqjen e kompanisë Shell nga Blloku 4 i kërkimeve në Shpirag, gjatë bashkëbisedimit me ndjekësit në median sociale “Facebook”.
“Përsa i përket naftës në Shpirag, një nga kompanitë më të mëdha të botës ishte aty në operim, eksplorim. U zbulua një rezervë shumë e madhe nafte, por për arsye të gjeologjisë jashtëzakonisht të ndërlikuar dhe të masivit gjeologjik të Shpiragut, kostoja e nxjerrjes me teknologjinë ekzistuese të kompanisë bëhet shumë e lartë”, theksoi kreu i Qeverisë.
Ai ftoi ndjekësit që të mos “gëzohen kur diçka e mirë për Shqipërinë, vonohet”.
Kujtojmë që, në fillim të muajit shkurt kompania holandeze Shell vendosi të tërhiqet nga Blloku 4 i kërkimeve në Jug të vendit, ndërsa ka pezulluar të gjitha operacionet e tjera të nxjerrjes së naftës në Shqipëri dhe po konsideron ndërprerjen përfundimtare aktivitetit në vendin tonë.
Në pasqyrat e audituara për vitin financiar 2023, të publikuara me vonesë vetëm në fillim të këtij viti, kompania Shell Albania Block 4 B.V. Dega Shqipëri shprehet se “gjatë muajve të parë të vitit 2024 … drejtimi i Degës ka vlerësuar situatën e operacioneve në Shqipëri.
Bazuar në vendimin e marrë nga menaxhimi, nuk ka asnjë synim për të vazhduar aktivitetin e saj të biznesit për një të ardhme të parashikueshme.
“Drejtimi vlerëson se likuidimi i Degës do të fillojë përgjatë vitit 2025”, thuhet në shënimet e pasqyrave financiare të kompanisë.
Shell Albania Block 4 B.V. është kompania që menaxhon kërkimet në Bllokun 4 të kërkimeve të naftës në Shqipëri, Bllok që shtrihet në zonën Jugore dhe Juglindore të vendit.
Kompania i përfitoi të drejtat e kërkimit në këtë zonë me Vendimin e Këshillit të Ministrave të qershorit 2018.
