Shtetet e Bashkuara të Amerikës do të kenë rol kyç në ngritjen e Byrosë Kombëtare të Hetimit. Ditën e nesërme mbyllen aplikimet për hetues të BKH dhe ata që do të përzgjidhen pritet që të kenë shumë punë para. Muaji tetor do të jetë periudha kur 165 kandidatët do të verifikohen.
Pas formularit prej 7 faqesh që kanë plotësuar kandidatët, pritet që të zgjidhen 60 oficerët më të mirë që do të jenë në krye të luftës kundër krimit të organizuar dhe korrupsionit të lartë shtetëror. Por pas përzgjedhjes, në muajin nëntor, 60 hetuesit do të nisen për trajnim në Shtetet e Bashkuara të Amerikës për gati 1 muaj. Muaji dhjetor do të jetë vendimtar për kupolën e drejtësisë.
Në këtë muaj, BKH pritet të jetë funksionale dhe gjëja e parë që ata do të bëjnë është monitorimi i njerëzve të drejtësisë. Përgjimi i telefonatave, e-mail dhe kontrolli i llogarive bankare të anëtarëve të Strukturës së Posaçme Antikorrupsion pritet që të jetë fokusi i parë i punës së Byrosë së Hetimit.
Deri më tani, monitorimi i anëtarëve të SPAK nuk ka ndodhur për shkak të mungesës së BKH, por me ngritjen e saj në dhjetor çdo gjë do marrë tjetër rrjedhë. Hetuesit specialë të FBI shqiptare do të kryejnë përgjimet, ndërsa Drejtoria e Përgjithshme e Pastrimit të Parave do të merret me kontrollin e llogarive bankare.
Ja parashikimet në ligj
Në ligjin “Për organizimin dhe funksionimin e institucioneve për të luftuar korrupsionin dhe krimin e organizuar”, janë parashtruar të gjitha hapat që do të ndjekin hetuesitë specialë për monitorimin e anëtarëve të SPAK. Më konkretisht, në nenin 42 të ligjit bëhet me dije se oficerët të cilët do të kryejnë monitorimin do të përzgjidhen përmes shortit për një periudhë 6-mujore.
Ky mandat afat-shkurtër nuk duhet të përsëritet dy herë dhe ata duhet të kenë eksperiencë 5-vjeçare si oficer i policë gjyqësore. Oficerët specialë të FBI shqiptare duhet të kryejnë monitorimin periodik jo vetëm ndaj anëtarëve të SPAK, por edhe familjarëve të tyre të cilët kanë dhënë pëlqimin dhe që janë mbi moshën 18 vjeç. Por BKH do të bashkëpunojë edhe me institucione të tjera për kontrollin e anëtarëve të SPAK.
Drejtoria e Pastrimit të Parave do monitorojë llogaritë bankare. “Oficeri përgjegjës për mbikëqyrjen është një hetues i Byrosë Kombëtare të Hetimit me të paktën pesë vite përvojë si oficer i Policisë Gjyqësore; Dy hetues emërohen me short për një mandat gjashtëmujor si oficer përgjegjës për monitorimin. Ky mandat nuk mund të përsëritet dy herë brenda një viti.
Drejtori i Byrosë Kombëtare të Hetimit, në prani të Drejtuesit të Prokurorisë së Posaçme dhe Kryetarit të Gjykatës së Shkallës së Parë kundër Korrupsionit dhe Krimit të Organizuar, bën përzgjedhjen me short; Një oficer përgjegjës, sipas pikës 2, të këtij neni, kryen vëzhgimin periodik të telekomunikimeve të kryetarëve, gjyqtarëve dhe punonjësve të gjykatave kundër korrupsionit dhe krimit të organizuar, drejtuesit, prokurorëve dhe punonjësve të Prokurorisë së Posaçme, Drejtorit, Zëvendësdrejtorit dhe hetuesve të Byrosë Kombëtare të Hetimit, oficerëve të shërbimeve të Policisë Gjyqësore, si dhe punonjësve të Byrosë Kombëtare të Hetimit.
Oficeri përgjegjës nuk ka përgjegjësi të tjera hetimore apo administrative”, thuhet në nenin 42 të ligjit “Për organizimin dhe funksionimin e institucioneve për të luftuar korrupsionin dhe krimin e organizuar”.
