Partia Demokratike nuk do të marrë pjesë në seancën e nesërme plenare, të thirrur jashtë radhe, por pa projekt-ligje në rend të ditës.
Në fund të mbledhjes së grupit të deputetëve demokratë, kreu i grupit të PD, Gazment Bardhi thotë se kjo nuk është një mbledhje e thirrur për axhendën personale të Kryeministrit dhe të Kryetarit të Kuvendit, pa asnjë rend dite të miratuar apo të shpallur zyrtarisht.
Bardhi shprehet se opozita refuzon të marrë pjesë në këtë seancë, në të cilën nuk do të diskutohet asnjë projektligj, por në rend dite ka vetëm miratimin e një procesverbali dhe njoftime. Për Bardhin, një “parlament pa rend dite, pa debat dhe pa të drejtë fjale për opozitën nuk është më parlament, por një dekor për propagandën e qeverisë”.
Ndërkohë Balla përmes një postimi në rrjetet sociale deklaroi se mungesa e deputetëve të PD-së në seancën e nesërme plenare, vjen sipas tij, pasi ditën e nesërme do të diskutohet dhe votohet projekt-rezoluta e PS-së për shpalljen e Iranit si shtet sponsor të terrorizmit. Balla teksa i përgjigjet deklaratës së Bardhit, shkruan se nuk ka asnjë agjendë personale nevoja e menjëhershme e një qëndrimi të Shqipërisë krah SHBA-së kundër veprimeve terroriste të Iranit.
“Keqardhje për njoftimin se Grupi Parlamentar i Partisë Demokratike do ta bojkotojë seancën e nesërme të Kuvendit të Shqipërisë, me pretekstin se në këtë seancë është propozuar nga ne një projekt-rezolutë për “Për shpalljen e Republikës Islamike të Iranit si Shtet Sponsor i Terrorizmit dhe Shtet që përdor mjete terroriste”. Sipas tyre nevoja e menjëhershme e një qëndrimi të Shqipërisë përkrah SHBA ndaj veprimeve terroriste të Iranit, qenka një agjendë personale. Seriozisht e mendoni këtë, apo ta kuptojmë si një lapsus?! Sonte mund t’ju them se sqarimet se pse kjo Rezolutë është urgjente do t’i japim nesër në Konferencën e Kryetarëve dhe urojmë që deri nesër keni ende kohë të reflektoni”, ka shkruar Balla.
Në seancën e datës 19 shkurt është miratuar Kalendari i Punimeve të Parlamentit. Në kalendar nuk është planifikuar asnjë seancë me darën 17 mars, por seanca është planifikuar me datën 19 mars.
