Prokuroria e Posaçme (SPAK) ka zbardhur detaje të reja nga dosja e dytë hetimore ndaj zëvendëskryeministres Belinda Balluku, që lidhet me dyshimet për shkelje në procedurën e tenderimit të Lotit 4 të Unazës së Madhe të Tiranës.
Nga ekspertiza informatike e kryer mbi telefonin Blackberry të ish-drejtorit të ARRSH-së, Evis Berberi (i sekuestruar gjatë hetimit), dalin komunikime direkte mes Ballukut, Berberit dhe, për herë të parë në këtë dosje, biznesmenit Ilir Shtufi. Këto biseda zhvillohen pikërisht në prag të hapjes së garës për Lotin 4.
Më 10 shtator 2021, Belinda Balluku i shkruan Berberit: “Hajde tek une ne 11”. Pak më pas i jep një udhëzim të qartë: duhej t’i thoshte një operatori ekonomik se “Punët i ke me Gimin, thuaj jo me mua”. Menjëherë pas këtij mesazhi, Evis Berberi merr kontakt nga Ilir Shtufi, i cili i shkruan: “Përshëndetje si ke qenë… Ilir Shtufi Nova jam.
Të takoj pak më kanë thënë kur mundesh”. Takimi mes Berberit dhe Shtufit duket se është zhvilluar brenda së njëjtës ditë, sepse pak orë më vonë Berberi i kthehet Ballukut me një mesazh të shkurtër: “E takova ok”.
Në ditët në vijim, mesazhet mes Ballukut dhe Berberit vazhdojnë të trajtojnë temën e konkurrencës në tender. Në një prej tyre, Balluku i shkruan: “Ne jemi për konkurrim të mirëqenë dhe të pastër. Pamfleti ka t’i hedhë nga jeta konkurrimin fitues të UK”.
Hetimet tregojnë se pak para mbylljes së afatit për dorëzimin e ofertave, shoqëria “Nova Construction 2021” (e lidhur drejtpërdrejt me Ilir Shtufin në këto komunikime) kishte nënshkruar marrëveshje bashkëpunimi me dy kompani të tjera.
Ky grup operatorësh ekonomikë u shpall më pas fitues i tenderit për Lotin 4 të Unazës së Re. Këto të dhëna, sipas SPAK, forcojnë dyshimet për ndërhyrje dhe koordinim të paligjshëm në favor të një grupi të caktuar kompanish.1.4s.
