Yabloko Nikolaj Rybakov, lideri i opozitës ruse ka dhënë një intervistë në lidhje me zhvillimet e fundit të ndodhura midis raporteve të Rusisë me SHBA-në dhe mundësitë që sipas tij ekzistojnë për të mbyllur luftën me Ukrainën.
Këto kanë qenë ditë të komplikuara për presidentin e Yabloko Nikolaj Rybakov. Partia e tij, bastioni i fundit i opozitës së quajtur sistematike, liberale dhe pacifiste, kishte gjithashtu rrezik të shpallej e ndaluar.
Prokuroria e Përgjithshme e ka shpallur së fundmi si ‘të padëshiruar’ në territorin rus Aleancën e Liberalëve dhe Demokratëve për Europën, të cilës Yabloko i përkiste.
Në të njëjtën kohë, partia e tij shpreson që në të ardhmen masat që e kufizojnë aktivitetin e tij me bashkëpunimin qytetar dhe politik mund të rishikohen.
Herën e fundit që u takuam, dhoma e pritjes në selinë tuaj ishte e mbushur me foto dhe fjalë të Mahatma Gandhit dhe John Lennon. Sot, a është paqja më afër?
Duhet të bëjmë një dallim midis ëndrrave të mia dhe asaj që ndodh në realitet. Ajo që shohim në realitet, nga Shtëpia e Bardhë deri në kryeqytetet evropiane dhe Moskë, është një mungesë e përgjithshme e vetëdijes.
A e prisnit një kthesë kaq të shpejtë në politikën e jashtme nga Putini, me afrim të shpejtë me SHBA-në?
Kemi thënë shumë herë që politika jonë e jashtme mund të ndryshojë shpejt. Shikoni sa herë kemi ndryshuar mendje për Turqinë. Është padyshim një defekt, por mund të bëhet edhe një cilësi: është prova se rifillimi i marrëdhënieve normale me shtetet evropiane do të jetë gjithmonë i mundur.
Ky afrim midis SHBA-ve dhe Rusisë është vetëm për Ukrainën apo do të bëhet një marrëdhënie strukturore?
Derimë tani janë përmirësuar marrëdhëniet personale midis Putinit dhe Trumpit, sepse ata janë politikanë të ngjashëm në stilin e tyre. Por nuk duhet harruar se, pavarësisht afërsisë, Trump vepron në politikë ashtu siç vepronte në biznes: një njeri i ngurtë që mbron vetëm interesat e tij. Siç bën Putini. Njerëzit që udhëtojnë në shtete si SHBA-ja dhe Rusia duhet të jenë të vetëdijshëm për përgjegjësinë shumë më të madhe që mbajnë mbi shpatulla. Në këtë kuptim, kam frikë se të dy kanë probleme të mëdha.
Çfarë do të thotë marrëveshja e ‘ngrohtë’ midis Putinit dhe Trumpit?
Në planin praktik e para është shpresa që gjatë këtyre ditëve të mos ndodhë ndonjë gjë e rëndë. Në planin strategjik, mendoj se nuk do të thotë asgjë, sepse Trump është i paparashikueshëm dhe Putini është shumë i vetëdijshëm për këtë.
Çfarë kërkon vërtet Putini?
Për të, zgjidhja më e mirë do të ishte krijimi në Ukrainë i një qeverie të modeluar sipas prototipit bjellorus: një shtet formalisht autonom, por krejtësisht besnik ndaj Putinit. Por ky është një skenar i paqartë. Në vitin 2014 ishte shumë më i mundshëm se sa është sot. Kujtoni sa konsulentë politikë dërgoheshin nga Moska në Kiev për zgjedhjet presidenciale? Kremlini akuzonte vendet perëndimore për ndikime të paautorizuara, por Rusia sillej pikërisht njësoj. Megjithatë, rivendosja e marrëdhënieve të pranueshme me Ukrainën do të jetë një punë shumë e gjatë dhe e vështirë. Por nuk jam i sigurt nëse këto plane afatgjata qëndrojnë në mendjen e Putinit. Ai do të veprojë vetëm përmes forcës dhe kështu do të jetë e pamundur të rilidhen marrëdhënie të arsyeshme mes dy popujve.
Putini mendon vërtet se mund të menaxhojë një person të pasigurt si Trump?
Për mua është e pamundur që ai ta arrijë këtë. Kujtoni që pikërisht me Trump filluan furnizimet masive me armë në Ukrainë. Trump merret me biznesin e tij, që është Amerika. Ajo që është e dobishme për Amerikën, ai do ta bëjë, dhe nuk ka vlerë të presësh më shumë. Ky aspekt e bën momentin që po jetojmë kaq të veçantë. Ideja e braktisjes nga SHBA e shumë projekteve dhe ambicieve globale është një goditje e fortë për të gjithë sistemin botëror, nga i cili nuk është e qartë se si do të dalin të gjithë, përfshirë Rusinë.
Yabloko, ‘Partia social-liberale e rrugës evropiane të Rusisë’, parashikon një përmirësim të marrëdhënieve midis Rusisë dhe Europës në të ardhmen?
Nuk ka alternativë për një normalizim strategjik të marrëdhënieve tona. Përndryshe, Europa nuk do të jetë në gjendje të konkurrojë me SHBA-në dhe Kinën. As Rusia nuk mund ta bëjë këtë. Por me liderët aktualë, nga ana e të dyja palëve, do të jetë e vështirë të arrihet ky qëllim. Me këtë brez politik, fatkeqësisht, nuk do të jetë një ëndërr e realizueshme.
Kur do të përfundojë kjo luftë?
Është thelbësore një armëpushim. Unë besoj dhe shpresoj se mund të ndodhë shumë shpejt. Një çështje tjetër është nënshkrimi i një marrëveshje paqeje. Por pasi të ndalojnë të vdesin njerëzit, politikanët mund të diskutojnë për vite, mjafton që të mos vdesin më njerëz, dhe kjo masakër e paarsyeshme të përfundojë. Mund të bëhet. Ne kemi shumë shembuj në histori, madje edhe në historinë bashkëkohore ruse, të bashkëjetesës pa luftë mes dy shteteve, edhe pa një traktat paqeje./ Corriere della Sera
