Pak fantazi, përdor shkallët për t’i kapur yjet, ato janë të bukura për t’u parë, mos i gjuaj me gurë sepse të verbon drita e tyre 🌟
Sa njerëz të çuditshëm që jemi. Edhe në luftë kur njerëzit ishin të dorëzuar, kishte sadopak keqardhje dhe jepej mëshirë. Sot ka shumë fytyra të qeshura për trishtimin e Brojës. Tipik skenë e mendësive të njerëzve që ndihen inferior, nuk ngjiten dot në lartësinë tënde dhe bëjnë çmos për të rrëzuar ty.
Sot që Broja është përtokë, sheh pak duar që të bëjnë të ngrihet dhe shumë të tjera që ia japin edhe nga një gjuajtje, nuk ngopen duke e parë dhe e shijuar fytyrën e dorëzuar.
Po mos harroni se njerëzit më të fortë dalin mbi situata të tilla. Ne e kritikojmë për ta shkundur, për atë verë të kaluar pa shumë përgatitje dhe stërvitje personale kur nuk kishte klub, por kaq, nuk e shijojmë vuajtjen ndërsa e shohim në sy.
Është njeriu që Pochetino tha se do të jetë si rasti i Harry Kane, është njeriu që për të fliste Michah Richards në koment pas ndeshje, Rio Ferdinand dhe yje të tjerë të kalibrit botëror në Angli duke e lavdëruar në studio.
Është njeriu që donte të vendoste Shqipërinë në hartë. Kur ishte në kulmin e tij te Chelsea tha: “Dua të dërgoj Shqipërinë në Botëror, të jem ylli i Shqipërisë”.
Mos u gëzoni përpara kohe dhe mos harroni, 45’+1′ Manaj në Air Albania dhe 45’+1′ Manaj në Serbi, iu kemi thënë ka edhe një Zot futbolli.
Armando Broja, je ende më i miri, edhe në ditët e tua më të këqija. Do të lëmë vetëm kur të krijohet një tjetër si ty, por duhen ende shumë vite…/Sport Ekspres
