Kandidatja për deputete e PD në listën e hapur Jorida Tabaku, duke dashur të shigjetojë Plarent Ndrecën e PS-së, i ka dhënë një tjetër goditje Sali Berishës. Në një studio televizive, zonja Tabaku tha se nuk mund të ulej në një tryezë me persona të përfshirë në korrupsion, duke iu referuar Plarent Ndrecës.
Deputeti i PS Plarent Ndreca, gjithashtu kandidat në Tiranë, është marrë i pandehur nga SPAK me akuzën e shkeljes dhe pabarazisë në tendera. Ndërkaq, Sali Berisha, i cili drejton partinë dhe koalicionin për të cilin kandidon zonja Tabaku, është marrë i pandehur nga SPAK për korrupsion. Po për korrupsion Sali Berisha është shpallur non grata nga SHBA-të.
Zonja Tabaku thotë se nuk ulet me të korruptuar, ndërkohë që në listën e kandidatëve është vendosur nga një i tillë. “Unë nuk mund të ulem dot në një tryezë me persona të cilët janë të përfshirë në korrupsion të drejtpërdrejtë”, tha Tabaku.
Disa ditë më parë, zonja Tabaku fshiu një video, përmes të cilës godiste Sali Berishën dhe besnikët e tij në listën e mbyllur. Gjatë një komunikimi me një qytetare, Tabaku u tregua miratuese ndaj etiketimit që qytetarja i bëri kupolës së PD duke e quajtur ‘llum’. Madje, Tabaku u distancua nga ‘llumi’ i PD, duke theksuar se nuk ishte pjesë e tij.
Jorida Tabaku ishte nënkryetare e Partisë Demokratike kur Lulzim Basha tentoi të distancohej nga Berisha në shtator 2021, por që Berisha i mori partinë dhe selinë për disa muaj. Tabaku u pozicionua në krah të Bashës.
Madje, Tabaku ka bërë një reagim të fortë kur Berisha rrethoi selinë e PD në 8 janar 2022. Tabaku shkroi se 8 janari ishte dita e fundit e Sali Berishës në politikë, pasi urdhëroi sulmin kundër PD-së.
“Vetëm dikujt që nuk i bëhet më vonë për PD mund të urdhëronte sulmin kundër saj. 8 janari ishte dita e fundit e Sali Berishës në politikë. Dje ishte një ditë e trishtuar për Partinë time, tek e cila aderoj që në moshën 16 vjeçare”, shkroi Tabaku.
Lulzim Basha i besoi Tabakut drejtimin e komisionit hetimor për inceneratorët. Pas Metës dhe disa oligarkëve mediatikë, edhe Basha kërkonte pjesën e tij nga inceneratorët, përmes kunatit. Madje kunati i tij dhe Shkëlzeni kishin përgatitur terrenin për të marrë biznesin e plehrave që kur Basha ishte kryetar i Bashkisë Tiranë.
Basha përdori komisionin hetimor për të kapur ndonjë lekë. Nuk e dimë nëse Tabaku ishte apo jo e vetëdijshme se po përdorej, por ajo e trumbeton komisionin sot si një arritje të saj në opozitë, si një sakrificë dhe përballje për interesin publik. Gradualisht, Tabaku u distancuar nga Basha, pasi kuptoi se po e braktisnin të gjithë. Por, Tabaku nuk iu bashkua menjëherë Berishës, pasi nuk ishte e sigurtë nëse Berisha do t’i ‘mbijetonte’ goditjes amerikane dhe goditjes së SPAK-ut.
Tabaku iu bashkua Berishës gradualisht. Ajo e mbylli vitin e ri 2024 nën tingujt e këngës së famshme të Sali Berishës, teksa vallëzonte së bashku me kolegët demokratë. Megjithatë, edhe pse zonja Tabaku ishte gruaja më e votuara në primaret e PD-së në Tiranë, tregues ky i mbështetjes që ka në bazë, Berisha e hodhi në ‘dallgët e detit të hapur’.
