Presidenti iranian ka paralajmëruar se ushtria amerikane dhe Izraeli do të jenë “objektiva legjitime” nëse Amerika sulmon Republikën Islamike, ashtu siç ka kërcënuar presidenti Donald Trump. Deklaratat e Mohammad Bagher Qalibaf janë të parat që e shtojnë Izraelin në listën e objektivave të mundshëm të një sulmi iranian. Qalibaf, një përkrahës i vijës së ashpër, e bëri këtë kërcënim ndërsa deputetët vraponin drejt podiumit të parlamentit iranian duke bërtitur: “Vdekje Amerikës!”.
Izraeli është në gjendje gatishmërie maksimale për shkak të mundësisë së një ndërhyrjeje të Shteteve të Bashkuara në Iran, shkruan Times of Israel duke cituar Reuters. Për një operacion të mundshëm amerikan thuhet se është diskutuar dje në një bisedë telefonike mes kryeministrit Benjamin Netanyahu dhe sekretarit amerikan të Shtetit, Marco Rubio.
Irani u ka atribuar Shteteve të Bashkuara përgjegjësinë për protestat që shpërthyen dy javë më parë në kryeqytet për shkak të vështirësive ekonomike dhe që më pas u përhapën në të gjithë vendin, me kërkesa për largimin e autoriteteve fetare.
Donald Trump ka deklaruar se vendi i tij është “gati të ndihmojë” lëvizjen, pasi kishte paralajmëruar se Irani ndodhej në “telashe të mëdha” për përpjekjet e tij për të shtypur protestat.
New York Times pohon se SHBA-ja ka tashmë gati një plan për Teheranin. Ai i është paraqitur Trumpit nga Pentagoni, me një listë objektivash të mundshëm, përfshirë edhe jo ushtarakë, në kryeqytet. Dilema nuk do të ishte më nëse, por si dhe kur të sulmohet, me krahun më të përmbajtur që po e shtyn presidentin të vonojë vendimin.
Gjatë natës së së shtunës, parulla kundër qeverisë mbushën rrugët e Teheranit, me protestuesit që nxitnin lëvizjen më të madhe kundër republikës islamike në tre vitet e fundit, pavarësisht një shtypjeje të fortë nën mbulimin e një ndërprerjeje të internetit.
Grupet për të drejtat e njeriut kanë raportuar dhjetëra të vrarë dhe, të shtunën, kanë shprehur shqetësim për ashpërsimin e represionit nga autoritetet: video të nxjerra fshehurazi tregojnë grumbuj trupash në spitale dhe morgje të mbingarkuara, ndërsa prokurori i përgjithshëm ka shpallur dënimin me vdekje për protestuesit. Pak informacion po qarkullon pas bllokimit të internetit, me monitoruesit e NetBlocks që tregojnë një lidhje pothuajse zero që nga e enjtja.
