Gjykata Kushtetuese ka publikuar sot një njoftim të ri zyrtar, ku sqaron afatin e shqyrtimit paraprak për çështjen me kërkues Kryeministrin e Republikës së Shqipërisë, që lidhet drejtpërdrejt me pezullimin e ministres Belinda Balluku. Sipas njoftimit, Gjykata ka vendosur që shqyrtimi paraprak nga Mbledhja e Gjyqtarëve të zhvillohet më 12 dhjetor 2025, duke shtyrë kështu çdo vendimmarrje deri në këtë datë.
Në njoftimin e publikuar më 03.12.2025, Gjykata Kushtetuese shprehet:
“Në vijim të njoftimeve të mëparshme për çështjen me kërkues Kryeministri i Republikës së Shqipërisë, Gjykata informon se shqyrtimi paraprak i çështjes nga Mbledhja e Gjyqtarëve do të bëhet në datën 12.12.2025 për shkak të kompleksitetit të çështjes, volumit të materialeve shoqëruese, agjendës së Gjykatës si dhe mbështetur në kërkesën e disa prej anëtarëve të saj. Vendimmarrja e Mbledhjes së Gjyqtarëve do të njoftohet rregullisht në faqen zyrtare të Gjykatës Kushtetuese.”
