Këngëtari legjendar turk, Ibrahim Tatlıses, i njohur gjerësisht si “Perandori”, është shtruar me urgjencë në spital pas një krize shëndetësore që pësoi në banesën e tij në Stamboll.
Sipas mediave turke, 74-vjeçari u ndie keq rreth orës 11:20, pak kohë pasi ishte rikthyer nga një turne i ngjeshur koncertesh jashtë vendit. Ai shfaqi simptoma si ulje e tensionit dhe dobësi të menjëhershme, çka bëri që familjarët të kërkonin ndihmë mjekësore urgjente. Një ambulancë e transportoi menjëherë drejt spitalit, ku iu nënshtrua një sërë ekzaminimesh të detajuara.
Testet laboratorike dhe tomografia zbuluan praninë e një infeksioni bakterial të rëndë, duke bërë që mjekët ta vendosin në kujdes intensiv, më shumë si masë parandaluese. Megjithatë, burime nga spitali bëjnë me dije se artisti është i vetëdijshëm dhe me funksione të qëndrueshme të zemrës dhe mushkërive. Drejtori i spitalit deklaroi se gjendja e përgjithshme e këngëtarit është e mirë dhe se trajtimi me antibiotikë ka nisur menjëherë.
Në një dalje për mediat, vajza e tij, Melek Zübeyde Tatlıses, tregoi se ishte ajo që e shoqëroi të atin në spital, duke zbuluar se infeksioni dyshohet të jetë i lidhur me tëmthin. Ajo shtoi se ekzaminimet vijojnë dhe nuk përjashtohet mundësia e një ndërhyrjeje kirurgjikale brenda ditës.
Gjatë orëve të fundit, pranë tij kanë qenë edhe familjarë të tjerë, mes tyre Dilan Çıtak Tatlıses dhe İdo Tatlıses, të cilët e kanë vizituar në spital. Ndërkohë, djali tjetër, Ahmet Tatlıses, nuk ka mundur të jetë i pranishëm për shkak të kufizimeve ligjore që lidhen me një çështje në proces.
Pavarësisht gjendjes aktuale, kjo nuk është hera e parë që “Perandori” përballet me sfida serioze shëndetësore. Në vitin 2011 ai i mbijetoi një sulmi me armë, i cili i shkaktoi pasoja të rënda dhe paralizë të pjesshme, ndërsa në vitin 2022 u përfshi në një aksident automobilistik. Megjithatë, ai ka vijuar të rikthehet në skenë me energji të admirueshme, duke ruajtur statusin e tij si një nga figurat më ikonike të muzikës turke.
Ngjarja ka prekur edhe marrëdhëniet familjare, të cilat prej kohësh kanë qenë të tensionuara. Në një mesazh emocional, Dilan theksoi se dashuria brenda familjes duhet të jetë e pranishme jo vetëm në ditë të mira, por në çdo moment, duke lënë të kuptohet për një afrimitet mes tyre në këto çaste të vështira.
Ky reflektim vjen pas një periudhe të gjatë konfliktesh, gjatë së cilës vetë Tatlıses kishte deklaruar publikisht se mund t’i përjashtonte fëmijët nga trashëgimia. Megjithatë, situata aktuale duket se ka zbutur raportet, ndërsa lotët dhe shqetësimi në dhomën e spitalit tregojnë se lidhja familjare mbetet më e fortë se çdo përplasje.
Ndërkohë, fansat e këngëtarit po ndjekin me ankth zhvillimet, duke shprehur mbështetje dhe lutje për shërimin sa më të shpejtë të “Perandorit”.
