Është përshkallëzuar më tej përplasja mes drejtorit të përgjithshëm të Top Channel Ben Blushi dhe ish- kryeministrit Sali Berisha, i cili në bashkëpunim me pronarin e TV Klan Aleksandër Frangaj ka ndërmarrë një fushatë të gjerë virtuale.
Përmes një vëzhgimi të thjeshtë nga Dosja.al, dy portalet që kanë marrë flamurin e sulmit ndaj Blushit, rezultojnë se në dy ditët e fundit në adresë të tij të kenë postuar më shumë se 15 shkrime.
Sulmi u intensifikua edhe më shumë pas reagimit të ish- deputetit socialist i cili pak ditë më parë i adresonte një letër së bijës duke i treguar mbi arsyet e sulmit nga familja Berisha.
Edhe pse nuk jepte shumë argumente, ai sillte në vëmendje se sulmohet pothuajse çdo ditë nga portalet e opozitës më shumë se çdo ministër, deputet, drejtor apo edhe më shumë se Kryeministri Rama.
Ish- ligjvënësi ka treguar se në 300 ditë në adresën e tij, dy portale të lidhura me familjen Berisha dhe Bode, kanë hedhur më shumë se 500 tituj, të cilat ai i konsideron shpifje.
Por pse Berisha ka shinjestruar pikërisht Ben Blushin? Arsyet janë vërtet pse ka blerë apo shitur disa prona private apo shkojnë më larg se kaq?
Një burim i tha Dosja.al, që arsyet janë disa:
Sipas tyre, sponsorizimet dhe akuzat janë nxitur nga ish-ortakët e Top Channel, Albert Sino dhe Aurel Barçi. Këta të dy akuzojnë Blushin, se ky ka ndikuar që ata të humbin gjyqin për aksionet e Top Channel në Gjykatën e Apelit.
Referuar po të njëjtit burim, nxitës tjetër duhet të jetë Alban Jaho, ish- drejtori i Digitalb, të cilin mendohet se Ben Blushi e hoqi nga puna afro dy vite më parë.
“Aksionerët e Digitalb që dihet se kanë ndikim tek këto portale duke nisur me Aleksandër Frangajn, Agim Zeqon dhe Mond Dukën etj.
Këta janë përplasur me Blushin për 8 % të aksioneve të kompanisë, të cilët më në fund ia morën Vjollca Hoxhës me një vendim gjykate, duke e kaluar në minorancë.
Sidoqoftë mendohet se pavarësisht ndryshimit të kuotave, Blushi e ka ende kontrollin e Digitalb dhe për këtë shkak, konflikti vazhdon.
Nxitës dhe fymëzues direkt i sulmeve është pa dyshim Aleksandër Frangaj, i cili nuk e mohon këtë gjë, pasi disa javë më parë kundër tij u firmos një peticion nga afro 150 punonjës të Digitalb, se ky i fundit i kishte lënë pa paga. Frangaj si pergjigje sulmoi direkt Ben Blushin te portali CNA.
Aleksandër Frangaj ka konflikte të hershme me Ben Blushin qysh se të dy punonin tek gazeta “Koha Jonë”.
Frangaj është shprehur se Blushi atë kohë në bashkëpunim me Nikollë Lesin e hoqën Frangajn nga gazeta për t’i zënë vendin. Që në atë kohë dy njerëzit që drejtonin gazetën më të madhe “Koha Jone” u ndanë. Aleksandër Frangaj u lidh me Sali Berishën, ndërsa Ben Blushi u bë deputet dhe eksponent i lartë socialist dhe mbeti gjithmonë anti-Berishës.
Rivaliteti i tyre vazhdon edhe sot për shkak të Top Channel dhe TV Klan, dy televizionet më të mëdha që ata drejtojnë respektivisht. Pasi TV Klan u ‘zbua’ nga platforma Digitalb, gati një vit më parë, lufta e të dyve është bërë edhe më e ashpër, pasi Frangaj mendon se duhet të hakmerret pasi Ben Blushi e ka zbuar dy herë: Herën e parë nga “Koha Jonë” në vitin 1995 dhe herën e dytë nga Digitalb”, dëshmojnë burimet.
Më tej, ato shtojnë se “familja Berisha është futur në këtë konflikt për këtë arsye dhe ka vënë në lojë të përditshme kundër Ben Blushit, jo vetëm portalin afër saj, Syri por edhe facebook-un personal të Sali Berishës, i cili gjatë vitit të fundit ka postuar më shumë se 100 tituj dhe akuza personale ndaj Blushit dhe familjarëve të tij, së fundmi edhe vajzës”.
Sa i përket daljes së TV Klan nga Digitalb, burimet sjellin në vëmendje se Sali Berisha postoi disa dhjetra shkrime ku akuzonte Ben Blushin për lojë të ulët dhe intriga që sipas tij kishin qëllim dobësimin e TV Klanit, i cili në atë kohë humbi rreth 300 mijë abonentë, situatë e cila vazhdon edhe sot e kësaj dite.
Por përveç arsyeve të vjetra, sherri mes Berishës dhe Blushit duket se ka edhe elementë të rinj.
Së fundi, Top Channel në dokumentarin e tij investigativ Top Story realizoi një cikël me tre pjesë për familjen Haklaj, me deshmitë të motrave Haklaj, të cilat akuzonin direkt Sali Berishën për vrasjet në Tropojë dhe zhdukjen me qëllim të vëllezërve të tyre.
Natyrisht ditët e fundit, këtij konflikti i është shtuar edhe Shkëlzen Berisha, pasi Top-Channel publikoi një kontratë, ku ky i fundit ishte bërë pronar i një fabrike boronicash, me vlerë 1.8 milionë euro.
Ende nuk dihet se sa do të vazhdojë kjo fushatë ndaj palëve dhe se deri në çfarë faze do të shkojë përplasja. (Dosja.al)
