Nga sot Gjykata Kushtetuese do të jetë funksionale, pasi presidenti Ilir Meta emëroi gjyqtarin e gjashtë, Përparim Kalon.
Mes Aleksandër Tomës e Përparim Kalos, Ilir Meta ka zgjedhur Kalon.
Më herët sot, Këshilli i Emërimeve në Drejtësi i dërgoi Metës dy kandidatura, përkatësisht të Kalos dhe atë të Aleksandër Tomës.
Kalo është anëtari i gjashtë i Gjykatës Kushtetuese, duke e bërë tanimë këtë gjykatë funksionale dhe duke përmbushur një kërkesë të ndërkombëtare për vënien në funksion brenda këtij viti.
Duhet thënë se vendimtar për ngritjen e Gjykatës Kushtetuese ka qenë presioni i shtuar i ditëve të fundit nga ambasadorja e SHBA në Tiranë, Yuri Kim.
Përparim Kalo është themelues dhe administrator i Kalo Associates, një kompani ligjore në Tiranë që ofron konsulencë, kryesisht për biznesin. Sipas përshkrimit të tij në faqen e biznesit, ai ka eksperiencë në “hartimin e legjislacionit tregtar si legjislacioni për koncesionet, energjinë e rinovueshme, lizingu financiar, etj” si dhe punon si përfaqësues i disa prej korporatave të mëdha ndërkombëtare.
Sipas ligjit, Këshilli i Emërimeve në Drejtësi duhej të përzgjidhte te kandidatë, por në këtë rast ishin vetëm dy. Javën e kaluar, Kuvendi i Shqipërisë zgjodhi ish-prokurorin Altin Binaj si anëtar i pestë i Gjykatës Kushtetuese, ku Binaj ishte kandidati i vetëm nga minimumi tre që kërkohen nga ligji.
Anëtarët e tjerë janë: Vitore Tusha, e cila vijon të mbetet në detyrë pasi i ka mbaruar mandati shumë vite më parë; Elsa Toska, e cila u zgjodh nga Kuvendi i Shqipërisë në nëntor 2019; Marsida Xhaferllari e cila u emërua nga Meta në nëntor 2019 dhe; Fiona Papajorgji, e cila ka një karrierë si këshilltare në Gjykatën Kushtetuese.
Shqipëria mbeti pa Gjykatë Kushtetuese në vitin 2018 pasi shumica e anëtarëve të saj u tërhoqën, dhanë dorëheqjen ose u shkarkuan nga vetingu. Plotësimi i vakancave rezultoi një proces i vështirë për shkak se palët politike synuan të kontrollonin procesin në pritje të përplasjeve të mundshme në këtë gjykatë.
Numri gjashtë përbën minimumin për mbledhjen e Gjykatës Kushtetuese në seancë plenare. Megjithatë, në mënyrë që të vendosin për diçka, anëtarët ekzistues duhet të jenë në një mendje në shumicë dërrmuese pasi nevojiten pesë vota për të marrë një vendim.
Dekreti i Metës
Presidenti i Republikës, Sh.T.Z Ilir Meta ka administruar sot nga Këshilli i Emërimeve në Drejtësi, Listën Përfundimtare të Renditjes së Kandidatëve të lejuar për kandidim dhe Raportin e Arsyetuar të Renditjes së tyre për plotësimin e vendit vakant në Gjykatën Kushtetuese (vakancë e parakohshme).
Sipas praktikës dokumentare të dërguar, Këshilli i Emërimeve në Drejtësi me vendimin nr. 59, datë 23.12.2020, ka vendosur miratimin e listës përfundimtare të renditjes së kandidatëve për gjyqtar në Gjykatën Kushtetuese, në vendin vakant, vakancë e parakohshme, e shpallur nga Presidenti i Republikës në datën 07.02.2018, e rishpallur në datën 27.09.2019 dhe e rishpallur për herë të tretë në datën 24.09.2020, me renditjen e kandidatëve si më poshtë:
1) Përparim Kalo 90.29 Pikë
2) Aleksandër Toma 75.57 Pikë
Presidenti Meta, pasi u njoh dhe vlerësoi praktikën dokumentare të vendimmarrjes, vlerësimit dhe të renditjes së kandidatëve të miratuara nga Këshilli i Emërimeve në Drejtësi; si dhe duke vlerësuar njëkohësisht nevojën jetike që ka vendi për plotësimin dhe funksionimin sa më parë të Gjykatës Kushtetuese, në përfundim të shqyrtimit, në mbështetje të neneve 93, 125 pika 1, 127 pika 3, 129, 149/d pika 1, të Kushtetutës së Republikës së Shqipërisë, neneve 7, 7/a pika 4, 7/b, 7/dh pika 2, të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, pa asnjë vonesë, me Dekretin nr. 11882, datë 23.12.2020, ka vendosur që:
– Zoti Përparim Kalo emërohet gjyqtar i Gjykatës Kushtetuese.
