Primaret në Partinë Demokratike u diskutuan në ‘Studio Live’ me Andi Mustafaj nga departamenti ‘Brain Gain’ i PD dhe gazetarët Poli Hoxha dhe Anri Bala. Mustafaj thotë se primaret do të bëhen pasi është në statutin e PD-së.
Nga ana tjetër kritikoi qasjen e PS-së dhe Ramës për zgjedhjen e deputetëve me platformën ‘Deputeti që duam’, pasi mund të dalin kandidatë pa personalitet politik.
‘Primare do ketë, është shkruar në statut, kryetarët e degëve duhen të japin dorëheqjen. Përgatitja është drejt fundit. Ajo do mbahet në javët në vijim. Besoj se në politika ka 3 kohë, koha e diskutimit ka qenë në Rithemelimin, koha e vendimit ka qenë në kohën e vënies në statut, koha e zbatimit është tani. Rithemelimi erdhi me premtime, sot është momenti për ti zbatuar. Fokusi është që primaret të jenë sa më të suksesshme. Çdo njeri duhet të futet në garë. Nuk mund të improvizosh si deputet. Pa pasur eksperienca, duhet të kemi deputet me karakter të fortë. Nëse marrim një grup të rinjsh, që nuk e kanë formësimin e personalitetit politik nuk mund ti kundërpërgjigjen Ramës. Për PD-në jemi munduar të zhvillojmë konceptin e lidhjes mes brezave. ‘
Më tej, Poli Hoxha theksoi se herët e tjera që janë bërë primaret në PD nuk ka pasur transparencë, ndërsa kësaj here Berisha po i mban varur ato.
‘Përveç një premtimi i rikthimit të zotit Berisha, vetë është zgjedhur me primare. Në këtë kuptim do ishte një bumerang nëse Berisha do bënte një hap pas. Bëri një sprovë shumë të madhe, sprova e parlamentit e karriges, sprova personale. Në pikëpamje parimore, kjo punë është e kryer. Ka një problem, listat e mbyllura dhe primare janë dy vija paralele që nuk shkojnë. Berisha këtej nën primare, andej Deputeti që duam, ndërsa dy vetë i mbyllën listat më keq se ç’ishin. Këto primare kanë një kontradiktë shumë të fortë me ç’janë në vetvete primaret. Doli dhe Shemsi Prençi që thoshte më kanë vjedhur. Nuk ka transparencë.
Kjo parti synon të rrëzojë Edi Ramën, që vetë vendos dhe vetë ndryshon. Po i mban të gjithë varur. Ashtu siç Berisha po i mban varur me primaret. Akoma po diskutohet për teknikalitetet e primareve. Ka kërkesa që do mbahet në rang kombëtar. I dyti varianti në rang qarku. Prapë do jetë përçarës. Akoma më e rëndë, varianti tjetër që disa i zgjedh kryesia apo Këshilli Kombëtar. Të gjitha këto janë një real politik, ashtu siç e shikoj. Aty brenda ka debate të rënda.’
Anri Bala shtoi se në primaret e PD-së nuk do përfshihen Meta dhe Dule pasi do futen në lista të sigurta pa u pyetur askush nga anëtarësia.
‘Demokracia e brendshme e partive është e vdekur me kohë. Janë sajesa për të vrarë konkurrencën. PS e ka zgjedhur me deputetin që duam. Ata që kandidojnë aty që nuk kanë bekimin e kryetarit të partisë, janë të humbur, nuk kanë asnjë informacion se ç’ndodh brenda partisë. Në PD nuk ka demokraci të brendshme, pasi kryetari vetë tha Meta do jetë në listën e sigurt të PD. A është pyetur anëtarësia e PD?
Zoti Meta përmes një koalicioni parazgjedhor sipas informacioneve kërkon 5 vende të sigurta. Për sa kohë ish LSI bën përjashtim nga primaret si mund të jenë të gëzuar anëtarësia e PD? Pjesa më e madhe aty nuk e shohin me sy Ilir Metën. E fajësojnë për gjithë katrahurën aty. Për sa kohë primaret janë fasadë, dhe ata që kandidojnë dhe fitojnë janë me bekimin e kryetarit.’
Mustafaj replikoi duke thënë se Shqipëria nuk është vendi ideal dhe nuk ka se si primaret të bëhen perfektë, por janë një proces i vazhdueshëm.
‘Ne nuk jemi vend ideal. Primaret nuk janë perfektë. Preferoj të jem anëtar i një partie që mundohet të përmirësoj mekanizmat, sesa anëtar i një partie krejt e kundërta. Primaret në PD nuk kanë ardhur akoma, nuk janë akoma fasadë. Primarja është parim i përgjithshëm, por jo puritan. Kur diçka është e re është normale të mundohesh të përmirësohet. Duhet menduar për një aleancë e madhe.’
PD, sipas Balës është në ditën më të keqe dhe maksimumi mund të marri 40 mandate.
‘PD në ditën më të keqe. 40 mandate mund të marrin dhe ka brenda Metën, Vangjel Dulen dhe krijon fragmentarizim të brendshëm.’
