Rasti i biznesmenit Ago Imer Gjolaj është padyshim një nga ato çështjet, që e nxjerrin cullak një shtet që ka dështuar në të gjithë funksionet e tij, ku si pa të keq një biznesmen kontrovers dhe me të kaluar të errët, sfidon shtetin, prokurorinë e gjykatat, edhe vazhdon i pashqetësuar aktivitetin e tij financiar prej vitesh. Ditën e sotme, Prokuroria e Shkodrës i ka bllokuar Gjolaj një shoqëri tregtare, 97 automjete, prona dhe llogari bankare, pasi biznesmeni akuzohet për “Pastrim i produkteve të veprës penale”.
Sipas Prokurorisë, pas hetimeve të kryera, ka rezultuar se biznesmeni Gjolaj është marrë me kontrabandimin dhe tregtimin e mallrave kontrabandë, si dhe është evidentuar si pjesëmarrës në grup kriminal që merret me trafikimin e lëndëve narkotike. Gjithashtu, pasuritë e tij dhe të familjarëve të tij nuk justifikohen nga pikëpamja ekonomike.
Prokuroria e Shkodrës ka regjistruar procedimin penal nr.1042 datë 27 Korrik 2017 për kryerjen e veprës penale “Pastrimi i produkteve të veprës penale ose veprimtarisë kriminale” parashikuar nga neni 287 i Kodit Penal. Bazuar në hetimet rezulton, se shtetasi Ago Gjolaj, ka dyshime se merret me kontrabandimin dhe tregtimin e mallrave kontrabandë si dhe është evidentuar si pjesëmarrës në grup kriminal që merret me trafikimin e lëndëve narkotike.
Pasuritë e sekuestruar të Ago Gjolajt dhe të shtetasve të lidhur me të:
1. Shoqëria tregtare “B.M” SHPK, me Nipt: K68404706Q;
2. Pasuritë e paluajtshme në pronësi të shoqërisë “B.M” SHPK, konkretisht, pasuria nr. 1155/8 ND2+N2, vol.28, fq.58, ZK.2105, Show Room, me sipërfaqe 199 m2; pasuria nr.1345/1, vol.10, fq.176, ZK.2221 indeks harte k-34-63 (95-D), adresa Koplik i sipërm, Rr.1, Malësi e Madhe dhe pasuria nr.37/4, vol.6, fq.69, ZK.1977;
3. 97 automjete në pronësi të shoqërisë “B.M” Shpk;
4. Gjendja aktuale në të gjitha llogaritë bankare (llogari rrjedhëse/depozita) në të gjithë bankat e nivelit të dytë në Republikën e Shqipërisë në emër të shtetasit A.Gj, shtetases S.Gj, si dhe të shoqërisë “B.M” SHPK;
Kompania “B.M” SHPK, që importon birrën “Bavaria”, është në pronësi të bashkëshortes të biznesmenit Sonjela Gjolaj, por e kontrolluar nga ky i fundit.
Sonela Gjolaj, bashkëshortja e biznesmenit, më datë 12 prill 2018 ka nënshkruar një kontratë për blerjen e një jahti me vlerë 300 mijë euro prej një shtetasi malazez S.J., i përfshirë në veprimtari kriminale dhe pastrim parash.
“Pas referimit nga Drejtoria Vendore e Policisë Shkodër, e cila është vënë në dijeni nga Zyra Kombëtare Interpol Tirana, se autoritetet e Malit të Zi kanë qenë duke hetuar shtetasen shqiptare Sonela Gjolaj, subjekt i lidhur me shtetasin A.Gj, pasi më datë 12.04.2018, ajo ka nënshkruar një kontratë për blerjen e një jahti luksoz me vlerë 300,000 (treqind mijë) euro nga shtetasi malazez S.J, i përfshirë në veprimtari kriminale dhe pastrim parash”, thuhet në njoftimin e prokurorisë.
Ago Gjolaj i cilësuar si një mashtrues e falsifikator markash prodhimi i pijeve energjike e 12 lloje lëngjesh e pijesh alkoolike, prej 7 vitesh ka marrë revansh të madh, duke u futur në treg me lëngje bodrumesh, të cilat i shet me ambalazh, logo e emër fals si pije “B52” e madje me Kod marke false të pa regjistruar në Drejtorinë e Pronësisë Industriale.
Për të krijuar paqartësi e mashtrim të konsumatorit, të njëjtën pije të falsifikuar “B52”, Ago Gjolaj e tregton dhe me logot “852” e “S52”, ndërkohë që në Shqipëri, sipas Drejtorisë së Marka-Patentave, Drejtorisë së Tatimeve e Drejtorisë së Doganave, është e certifikuar vetëm një markë pije “B52”, me përfaqësuese ligjor ekskluziv kompaninë “Arseni Sh.p.k”.
Por megjithëse kompania “Arseni Sh.p.k”, ka fituar dhe me vendime gjyqësore të formës së prerë deri në Gjykatën e Lartë, të drejtën e importimit, prodhimit, tregtimit e promovimit të pijes “B52”, Drejtoria e Marka-Patentave, Drejtoria e Tatimeve dhe Drejtoria e Doganave po lejojnë mashtruesin Ago Gjolaj, të tregtojë këtë pije me “ujë Kopliku” e të pa regjistruar, sikur është ”B52” e me 2 emra të tjerë “852” e “S52”.
Madje mashtrimi i prodhimit dhe importi i paligjshëm, Drejtorisë së Marka-Patentave e Tatimeve, i është raportuar disa herë në vitet 2018-2022 edhe nga Anti-krimi ekonomik e Anti-kontrabanda, ndërsa dogana i ka hapur derën në kufijtë Kosovë-Maqedoni-Mali i Zi për import-eksporte të pa certifikuara.
Sipas raportit Nr. 154/M.a, datë 22.04.2022 të Anti-krimit Ekonomik dhe Proces-Verbalit të Kontrollit Nr. 67/2, datë 19.05. 2022 të Taskë- Forcës Hetimore” të Tatimeve, thuhet se firma “M.B Sh.p.k” është konstatuar se ka gjendje e hedh në treg, 60 herë më tepër sasi pijesh, se sa raporton të prodhuara e importuara.
