Teksa sot ishte parashikuar që të mbahej seanca paraprake për presidentin e Partisë së Lirisë, Ilir Meta dhe ish-bashkëshorten e tij, Monika Kryemadhi, gjyqi është shtyrë. Shkak është bërë mungesa e avokatit mbrojtës të Kryemadhit.
Ndërkohë, ish-deputetja Monika Kryemadhi, në një deklaratë për mediat jashtë ambjenteve të SPAK hodhi akuza teksa tha se SPAK vazhdon të shantazojë Ilir Metën dhe familjen e saj me hetimet që po vazhdon edhe pse dosjen e ka kaluar për gjykim.
Ajo shënjestroi Altin Dumanin duke e cilësuar si ushtar të Yuri Kim, ish- ambasadores së SHBA.
Sipas saj, gjithçka është stisur nga ish-ambasadorja amerikane në Shqipëri, Yuri Kim.
“Një gjë të mirë kishte sot seanca, sepse sot kemi kompanitë apo personat që kanë paguar fatura në emër të të ashtuquajturës LSI.
Del në pah “grushti i shtetit” apo “puçi” ndaj familjes sime apo rrethit shoqëror”, deklaroi Kryemadhi.
“Një kompani amerikane ka paguar për lobim në SHBA. Që nga ky moment, akuzat për lobimin nuk bëjnë gjë tjetër veçse ngarkojnë me faj kompaninë GSIS, që ka pranuar që në llogarinë e një kompanie lobimi të paguhen para në emër të një partie shqiptare.
Tani do nisë të zbardhet skema e gjuetisë së shtrigave të Yuri Kim, që për fat të keq nuk e zgjidh dot me një bursë në Angli për xhelatin e saj që ka në SPAK”, tha ajo.
