Partia Socialiste ka shtyrë për në fund të gushtit mbajtjen e Asamblesë Kombëtare. Edhe pse u përfol që mbledhja e Asamblesë do të thirrej në fund të korrikut, diçka e tillë pritet të ndodhë në fund të verës. Gazeta ka mësuar se për shkak të pandemisë së Covid-19, rritjes së numrit të të infektuarve dhe kohës së nxehtë, PS ka menduar që ta shtyjë për në fund të gushtit mbledhjen e Asamblesë.
Gjatë punimeve të Asamblesë, socialistët do të zgjedhin kryesinë e re, sekretariatin dhe Sekretarin e Përgjithshëm të Partisë Socialiste, ndërsa mësohet se në këtë takim do të ketë edhe një raportim nga ana e deputetëve, kryetareve të degëve, ministrave dhe kryebashkiakëve se si ka shkuar riorganizimi i partisë, por edhe takimet me qytetarët në kuadër të zgjedhjeve parlamentare të vitit 2021.
Prej disa ditësh të gjithë kanë zbritur në bazë, duke karikuar elektoratin, madje gazeta e ka deklaruar se socialistët kanë nisur edhe sondazhet për të shikuar simpatinë, apo çfarë nuk shkon, në mënyrë që kur fushata elektorale të hapet zyrtarisht, ata të kenë mundësi që të reflektojnë në program të gjitha shqetësimet e qytetarëve. Kështu që, nisur nga këto zhvillime, të gjithë i kanë sytë tek Asambleja, e cila pritet të vendosë pikat mbi (I) në shumë aspekte.
Ministrat në ankth për ndryshimet në qeveri
Por votimi i forumeve të reja të partisë, nuk janë të vetmet vendime që pritet të merren gjatë mbledhjes së Asamblesë Kombëtare të Partisë Socialiste. Eshtë mësuar se Asambleja mund të sjellë surpriza, pasi gjithmonë mbledhja e saj mund t’u hapë rrugë ndryshimeve në qeveri. Dhe kur mendon që ajo të mblidhet në fund të gushtit, shtohen shanset që të kemi ndryshime në qeveri, pasi jo vetëm që fillon sesionin i ri parlamentar, po afrohemi edhe më shumë zgjedhjeve parlamentare.
Mirëpo, shtyrja e Asamblesë Kombëtare për në fund të ngushtit ka rritur edhe ankthin në radhët e ministrave, pasi ata do të raportojnë për punët e tyre dhe se çfarë kanë arritur të bëjnë sa u takon reformave të vendosura nga qeveria, por edhe ato integruese. Kështu që, duke qenë se edhe vetë deputetët e PS nuk e kanë mohuar që në Asamble mund të ketë ndryshime qeveri, por edhe për faktin se disa ministra e ndiejnë veten të rrezikuar për shkak se nuk kanë arritur pritshmëritë, mbledhja e kësaj organizime ka shtuar ankthin tek ministrat.
Po ashtu, një tjetër arsye që mund të kemi ndryshime në qeveri, të cilat mund të vendosen që në mbledhjen e Asamblesë së fundgushtit është edhe procesi i integrimit. Në vjeshtë pritet të mbahet mbledhja e para ndërqeveritare mes qeverisë shqiptare dhe Bashkimit Europian. Dhe duke qenë se qeverisë i duhet një impuls i ri, kryeministri Rama mund të bëjë dikë “kurban” nga vartësit e tij. Megjithatë, mbetët të shihet kur të mblidhet Asambleja Kombëtare e Partisë Socialiste se çfarë do të prodhojë më konkretisht.
Rama porosi deputetëve dhe kryebashkiakëve
Pak ditë më parë kryeministri Edi Rama ka pasur një sërë takimesh me deputetët e Partisë Socialiste dhe kryebashkiakët socialistë, ndërsa iu ka kërkuar që të zbresin në terren dhe se në zgjedhjet e ardhshme parlamentare do nga ata 800 mijë vota.
Madje,kryeministri Rama u ka thënë kryebashkiakëve se duhet fokus në zgjedhjet e përgjithshme, pasi nuk ka zgjedhje të parakohshme lokale siç pretendon opozita joparlamentare. “Në fushatën elektorale peshën më të madhe do ta kenë deputetët dhe kryetarët e partisë. Ju si kryebashkiakë duhet të ndihmoni këtë proces, por pa neglizhuar në asnjë moment shërbimet ndaj qytetarëve. Punonjësit e bashkive të përfshihen në fushatë vetëm pas orarit zyrtar të punës” mësohet të ketë thënë kryeministri.
