Nga Adriatik D
Ish ministri i LSI-së në krye të Drejtësisë, Ylli Manjani, befasoi jo pak opinionin publik, kur u shfaq në podium, në protestën e thirrur nga Sali Berisha në 20 dhjetor 2021, para Kryeministrisë, gjoja kundër vizitës së Aleksandër Vuçiç në Tiranë, por që në fakt u lexua si një demostrim i dështuar force kundër Shteteve të Bashkuara të Amerikës.
Manjani, i cili ka kaluar sa nga PS-ja tek LSI-ja dhe së fundi nga LSI-ja tek Berisha, është ekspozuar edhe me kritika të forta dhe sulme ndaj ambasadores amerikane në Tiranë, Yuri Kim. “Sa herë të dëgjoni zonjën Kim është Rama nga prapa… Përderisa ka arritur ta përdorë si ministre të propagandës ambasadoren e SHBA, vërtetë BRAVO!”, tha Manjani në shtator të vitit 2021.
Në korrik 2021, Manjani hodhi idenë e dëbimit të ambasadores së SHBA, Yuri Kim, nga Shqipëria. “Për mendimin tim drejtuesit e Partisë Demokratike duhet të ndërpresin kontaktet me Ambasadoren Yuri Kim… Kolegët e saj kudo në Evropë përzihen nga vendet ku shërbejnë për shumë më pak”.
Ideja e dëbimit nuk ishte e paprecedentë. Në fakt, Ilir Meta dhe Sali Berisha, në vitin 2010, kërkuan përmes një letre sekrete drejtuar DASH dëbimin e ish ambasadorit amerikan në Tiranë, Xhon Uidhers, me argumentin se kishte kritikuar qeverinë e tyre. Por si përgjigje morën një shuplakë nga SHBA.
Po pse Ylli Manjani është rreshtuar me Berishën dhe sulmon ambasadoren amerikane në Tiranë, Yuri Kim, e cila sipas DASH përfaqëson qëndrimet e Shtëpisë së Bardhë? Arsyet mund të jenë të shumta.
‘Perandori i drogës’ Klement Balili, ish-drejtor i LSI-së për Transportin në Sarandë, u godit falë angazhimit të DEA-s amerikane. Për kapjen e tij, Ambasada Amerikane në Tiranë, ushtroi një presion të jashtëzakonshëm. Presioni ishte i tillë saqë Balili u dorëzua në polici, duke u dënuar më pas me 10 vite burg, ndërsa iu bllokua një pjesë e pasurisë.
Po ç’lidhje ka Manjani me Balilin?
Kur ‘Eskobari i Ballkanit” ishte në arrati dhe ish-ambasadori amerikan Donald Lu deklaronte se nuk ka vullnet për të kapur, Ylli Manjani ishte ministër i Drejtësisë, i propozuar nga LSI-ja. Sa herë ushtrohej presion për kapjen e Balilit, Manjani reagonte me nervozizëm, duke deklaruar arrestimi ishte një detyrë e policisë, një e vërtetë në fakt.
Dy ditë pas dorëzimit të Balilit në janar të 2019, Manjani bëri një deklaratë të çuditshme, teksa tha se “Që mesa di unë akuzat i ka ngritur prokuroria greke dhe jo ajo shqiptare. Gjithë debati mbi çështjen janë muhabete që fryhen e fryhen e fryhen, unë nuk e di, por duhet të flasë gjykata”.
Në vitin 2017, Manjani u akuzua se kishte blerë një apartament tek një kompani, e cila kishte ndërtuar në pronën e vëllait të Klement Balilit. Dihet që Balili e kishte kamufluar një pjesë të pasurisë në emër të të afërmve.
Manjani pranoi blerjen e apartamentit, por sipas tij, jo tek Balilët. Manjani tha se nuk e kishte blerë tek Bashkim Balili, por tek Pëllumb Hysi.
Në mars të vitit 2017, doli në skenë Rigels Balili, nipi i trafikantit të drogës. Balili tha se gjithë verën Ylli Manjani e kishte kaluar në kompleksin e Balilëve, i cili sipas prokurorisë ishte ndërtuar me para droge. “Mund t’ju them se Manjani ka qenë i vetmi ministër që frekuentonte kompleksin. Manjani gjithë verën pushonte në kompleksin tonë me familjen e tij”, tha nipi i Balilit.
Këtë herë Manjani e pranoi se kishte kaluar pushimet tek Hoteli i Balilit, duke shtuar se nuk kishte gjë të paligjshme. Megjithatë, të gjitha këto rrethana nuk do të thonë domosdoshmërisht se Manjani sulmon SHBA dhe është bashkuar me Berishën, për shkak të goditjes së Balilit.
