Ish-presidenti rus Dmitry Medvedev tha të hënën se furnizimi i Ukrainës me raketa Tomahawk nga SHBA-ja mund të përfundojë keq për të gjithë, veçanërisht për Presidentin e SHBA-së Donald Trump.
Medvedev, i cili e ka provokuar vazhdimisht Trumpin në mediat sociale, tha se është e pamundur të bëhet dallimi midis raketave Tomahawk që mbajnë koka bërthamore dhe atyre konvencionale pasi ato të lëshohen.
“Si duhet të përgjigjet Rusia? Pikërisht!” tha Medvedev në Telegram, duke lënë të kuptohet se përgjigja e Moskës do të jetë bërthamore.
Trump tha përsëri të dielën se ai mund të ofrojë raketa Tomahawk me rreze të gjatë veprimi që mund të përdoren nga Kievi nëse Putini nuk i jep fund luftës në Ukrainë.
“Po, mund t’i them atij (Putinit), nëse lufta nuk zgjidhet, ne mund ta bëjmë shumë mirë,” tha Trump. “Mund të mos e bëjmë, por mund ta bëjmë… A duan që Tomahawk të shkojnë në drejtimin e tyre? Nuk mendoj kështu”, deklaroi Trump.
Medvedev shkroi: “Mund të shpresojmë vetëm që ky është një tjetër kërcënim bosh… Si dërgimi i nëndetëseve bërthamore më afër Rusisë.”
Ai i referohej deklaratës së Trump në gusht se kishte urdhëruar dy nëndetëse bërthamore të afroheshin pranë Rusisë në përgjigje të asaj që ai e quajti komente “shumë provokuese” nga Medvedev në lidhje me rrezikun e luftës.
Putin ka thënë se furnizimi i Ukrainës me raketa Tomahawk, të cilat kanë një rreze veprimi prej 2,500 km dhe për këtë arsye mund të godasin kudo brenda Rusisë Evropiane, përfshirë Moskën, do të shkatërronte marrëdhëniet midis Shteteve të Bashkuara dhe Rusisë.
Presidenti ukrainas Volodymyr Zelenskiy tha se Ukraina do të përdorte raketa Tomahawk vetëm për qëllime ushtarake dhe jo për të sulmuar civilët në Rusi, nëse SHBA-të do t’i siguronin ato.
