Kryeministri Edi Rama ka publikuar pamje alarmante nga zona e Shkozetit, ku një kanal kullues është përmbytur totalisht si pasojë e grumbullimit masiv të plehrave dhe mbetjeve plastike.
Në reagimin e tij, Rama e lidh drejtpërdrejt situatën me mungesën e përgjegjshmërisë qytetare, duke theksuar se ndotja e përditshme kthehet në rrezik real gjatë reshjeve intensive.
“Sigurisht që kur i hedhim plehrat e shishet plastike nëpër fusha e në anët e rrugëve të atdheut që e duam vetëm në stadium, vjen një ditë shiu me gjyma që i mbledh nga janë e nga s’janë dhe i dynd në det. Por kur shiu është aq i furishëm sa ky i fundit, atëherë nuk arrijnë dot detin si zakonisht, sepse gryka e kanalit taposet krejt, duke përmbytur dynjanë…”, shkruan Rama.
Pamjet nga Shkozeti tregojnë qartë se kanalet e bllokuara nga plehrat janë kthyer në burim përmbytjesh, duke rrezikuar banesa, biznese dhe jetën e qytetarëve.
