Këngëtari me origjinë shqiptare, Ermal Meta, është kthyer në Festivalin e Sanremos, ku u shpall fitues 3 vjet më parë me një këngë të kënduar bashkë me Fabricio Moron. Ai konkuron me një baladë me titullin “Un milione di cose da dirti” (Një mijë gjëra për të të thënë”, një këngë dashurie, ndryshe nga ato të mëparshmet, të lidhura me temat sociale.
Këngëtari ka treguar ndërkohë raportin me sportin, me vrapin dhe futbollin. Në këtë periudhë jete sedentare, Meta përpiqet ta mbajë trupin në formë me aktivitete të ndryshme: “Sporti im i preferuar është vrapi, por nuk është e lehtë që të jem konstant. Kur luaja futboll si mesfushor i djathtë, nuk më kapnin dot (qesh), ndërsa tani, nëse ngjit shkallët deri në katin e tretë, më merret fryma”.
Disiplina të tjera që praktikon?
Pilates dhe ushtrime me trupin lirshëm për të pasur elasticitet.
Në jetë ndjehesh më shumë sulmues, apo mbrojtës?
Ndjehem më shumë mesfushor, një rol që të bën të lodhesh shumë.
Skuadra e preferuar?
Napoli. E dua qytetin, është plot me ngjyra, me një traditë të madhe muzikore. Skuadra po kalon një periudhë të vështirë, ndërsa Gatuzo mbetet i preferuari im. Mesi lind, Gatuzo bëhesh, vullneti e mund talentin.
Do të këndoni edhe “Caruso”, të Luçio Dalës, me “Napoli Mandolin Orchestra”…
Një pjesë impenjative, të gjitha ma kanë këshilluar ta këndoj, kështu që e zgjodha, më pëlqen ta vë veten në provë.
Si e imagjinoni një skenë pa publik?
Do të jetë pak e çuditshme të këndosh në një teatër bosh, por mendoj se shumë më e vështirë do të jetë për prezantuesit Amadeus dhe Fiorelo, ndaj dhe gjithë solidariteti im shkon për ta.
