Nga Anri Bala
Lulzimin e kisha menduar si një nxënës i keq i Sali Berishës, i cili përdor vegla prehistorike në kohën e teknologjisë moderne. Kurrë nuk më shkonte mendja se mësimet e usta Saliut, me arkaizmin e tyre do t’i hynin në punë në vitin me tre dysha.
Kurrë nuk do ta besoja, se hekuri dhe zjarri do mposhtej nga gazi dhe shurrtari! Mirëpo ndodhi dhe për të mos i’a çuar dëm mundin ustait, çiraku jo që i’a ka vjedhur zanatin, veset, intrigat, mashtrimet, por i ka përsosur aq shumë, sa e ka lënë të shokuar mjeshtrin e tij, madje… të turpëruar.
Gabimi është i ustait të ligësive, që i’a dha në dorë të gjitha çelsat dhe drynat dhe nuk la asnjë derë hapur, more një deriçkë të paktën, të hynte në WC për të shurruar, aty ku ishte zot dhe pronar i gjithçkaje.
Tani, i bie kokës me grushta dhe portës së kullës së tij me gurë, por “Nuja” nuk e hap se “Ati” është përlyer nga zotat tanë, si i pamoralshëm, hajdut, makut dhe i pangopur, trim i frikësuar dhe armik i tërbuar… i demokracisë.
Kjo, nuk do të thotë se argati është engjëll, por me dinakërinë që e karakterizon dhe me mësimet e marra nga ustai i tij, ai po vërtit nëpër duar “gjylen”, që amerikanët i kanë dhënë në dorë, që ta hedh sa më larg, sipas variantit: “Le t’i bjeri kujt t’i bjeri, vetes time mos t’i bjeri”!
Tani në fakt, ai e ka hedhur gjylen, por ustai nuk e beson dhe nuk pranon të zgjohet nga ëndrra me sy hapur, që të shikoj se si nxënësi i lig përpos se i mori gjithçka… i mori dhe fytyrën, duke e lënë rrugëve si “lehës” pa kolibe, e që për tu dukur se është gjallë, leh çdo ditë pas dyerve të mbyllura për të, me çelsat dhe bravat që i dhuroi vetë me shumë bujari, në dorën e gabuar… tek nxënësi “pa din e pa iman.”/Ekskluzive.al
