Ndihmës Sekretari Amerikan i Shtetit, ambasadori Philip Reeker kritikoi Bashkimin Europian për dështimin e strategjisë së zgjerimit në Ballkanin Perëndimor.
Nga Forumi i Prespës, diplomati i lartë ka shprehur zhgënjimin për mospërcaktimin e një date për hapjen e negociatave të anëtarësimit për Shqipërinë dhe Maqedoninë e Veriut, ndërsa deklaroi se shtetet anëtare duhet t’i përgjigjen me korrektësi Tiranës dhe Shkupit gjatë lidershipit slloven të këshillit. Sipas tij, është koha që Brukseli të mbajë pretimin dhe të mbajë Konferencën e Parë Ndërqeveritare me Shqipërinë.
“Vendimi i Bashkimit Europian për hapjen e negociatave me Maqedoninë e Veriut dhe Shqipërinë ishte frymëzues, po nëse nuk ndërmerr hapa konkrete tani BE do të humbasë besueshmërinë. Shpresojmë që BE të mbajë sa më shpejt konferencat e para ndërqeveritare me të dyja vendet.
Çdo vonesë e mëtejme për fillimin e negociatave rrit euroskepticizmin e qytetarëve dhe reflekton negativisht mbi situatën politike në vende”, deklaroi ai. Po ashtu, zoti Reeker theksoi se qasja e Brukselit ndaj Shqipërisë dhe Maqedonisë së Veriut e ka bërë tejet kritike situatën në këto vende.
“Mendoj se të gjithë jemi të vetëdijshëm që besueshmëria e Bashkimit Europian në rajon aktualisht gjendet në pikën më të ulët. BE dhe të gjitha shtetet anëtare duhet të punojnë që ta rikthejnë këtë besueshmëri. Kjo ishte një pikë e rëndësishme që sekretari Blinken e diskutoi edhe gjatë takimeve në Berlin, Paris dhe Romë”, nënvizoi ai.
SHBA paralajmëron masa kundrejt të korruptuarve
Nga ana tjetër, Ndihmës Sekretari Amerikan i Shtetit, Philip Reeker gjithashtu theksoi rikthimin e Amerikës, veçanërisht në bashkëpunimin me Europën, duke theksuar se axhenda e presidentit Biden është e fokusuar në thellimin e partneritetit. Zoti Reeker po ashtu deklaroi se kushdo që do të mundohet të destabilizojë procesin, do të ndërmerren masa.
“SHBA ngelet tërësisht e përkushtuar për Ballkanin Perëndimor dhe vizioni ynë është që Europa të jetë e lirë dhe në paqe. Atë që e tha presidenti i SHBA-së për sanksione ndaj atyre aktorëve që dëshirojnë ta minojnë këtë proces, do të mundësojë të përforcohet ky qëllim, duke kontribuuar drejt pushtetit efikas dhe duke e pranuar se integrimi i plotë në institucionet transatlantike është ajo që presim”, u shpreh ai.
Reeker u ndal edhe tek integrimi i Maqedonisë së Veriut, ku u shpreh se duke bërë hapat e nevojshme për vazhdimin e reformave do të ketë garanci për një të ardhme më të mirë. Sipas tij, SHBA do të vazhdojë të jetë një aleate dhe mike e vendit.
“Jemi të bindur se Maqedonia e Veriut do t’i bëjë hapat e domosdoshëm siç janë vazhdimi i reformave, lufta kundër korrupsionit, rritja e transparencës që të garantojë një të ardhme më prosperuese si edhe përforcimin e stabilitetit në rajon. SHBA është pjesë e këtij rajoni dhe do të vazhdojë të qëndrojë pranë siç tha dhe presidenti Biden, si aleate dhe si mike”, tha ai.
