Shtetet e Bashkuara të Amerikës janë të vendosura për të shfarosur korrupsionin në Shqipëri. Për plot 30 vjet janë vjedhur miliona euro nga taksat e qytetarëve, por përgjegjësit jo vetëm që nuk kanë dalë para drejtësisë, por vijojnë të jenë në politikë apo poste drejtuese. Mirëpo dje ambasada amerikane në Tiranë iu ka futur të dridhurat pushtetarëve në vend, pasi e ka bërë të qartë se drejtësia nuk do të tolerojë më askënd.
Përmes një postimi në rrjetin social Facebook, ambasada ka shpërndarë një video, ku thekson se pushtetarëve të përfshirë në afera korrupsioni dhe bosëve të krimit po iu mbarojnë ditët kur ata ishin të paprekshëm nga drejtësia në vend. “SHBA janë të përkushtuara të ndihmojnë Shqipërinë për të ndërtuar një sistem drejtësie me integritet. Të gjithë qytetarët shqiptarë janë aktorë kur kërkojnë që reforma e drejtësisë do të çojë në një gjyqësor transparent dhe që i jep llogari publikut. Ditëve të shkuara të zyrtarëve të korruptuar dhe bosëve të krimit që ishin të paprekshëm po ju vjen fundi. Ditët e shkuara të drejtësisë selektive do të zëvendësohen nga drejtësia për të gjithë. Një strukturë e re anti-korrupsion po krijohet me mbështetjen e SHBA e cila do të ketë në shënjestër këta individë që ia kanë dalë të shmangim ndjekjen penale nëpërmjet kontrollit të emërimeve dhe lidhjeve personale”, thuhet në mesazhin e SHBA.
Ngritja e SPAK
Më tej, një javë para ngritjes së SPAK, ambasada amerikane e vendosi theksin të qëllimi dhe funksionimi i këtij organi të ri në sistemin e drejtësisë. Në reagim theksohet se Uashingtoni do angazhohet që SPAK të jetë i paanshëm dhe të mos tolerojë asnjë, si dhe do të punojë fort me institucionet ligjzbatuese në Shqipëri dhe partnerë ndërkombëtarë për të mbështetur dhe forcuar ndjekjet penale për bosët e krimit dhe zyrtarët e zhytur në afera korruptive. “SPAK do të funksionojë së shpejti, do të shënjestrojë korrupsionin e nivelit të lartë. SHBA janë të përkushtuara për të siguruar që SPAK do të ngrihet dhe do të funksionojë në mënyrë të pavarur. Me mbështetjen e tyre prej 2 mln dollarësh, SHBA po ndërtojnë themelet e SPAK.
Këshilltarët ligjorë të Ambasadës së SHBA po punojnë me institucionet shqiptare të drejtësisë dhe partnerët ndërkombëtarë për të zhvilluar themelet e SPAK dhe do të mbështesim hetimet dhe ndjekjet penale. Rregullat do të ndërtojnë një proces të bazuar në meritë dhe garanton promovime që janë të lira nga ndërhyrje politike apo të ndonjë lloji tjetër të papërshtatshëm, ofrojmë mbikëqyrje për raste hetimore”, thuhet në reagimin e ambasadës.
Bashkëpunimi me ekspertë të huaj
SHBA duket e vendosur në qëllimin e saj për të luftuar krimin dhe korrupsionin. Dhe për ta realizuar sa më shpejt këtë gjë, ka premtuar se do të sjellë ekspertë ndërkombëtarë, duke theksuar se në fillim të vitit 2020 prokurorët amerikanë do të ofrojnë trajnim për SPAK për çështje mjaft sensitive për publikun, siç është lufta ndaj krimit, korrupsionit apo edhe pastrimit të parave. “Sistemi i ri i drejtësisë garanton dy gjëra, pavarësi më të madhe të hetimeve nga ndikimi politik dhe lloje të tjera ndikimesh të papërshtatshme, por edhe llogaridhënie më të madhe të hetimeve nga ndikimi politik dhe lloje të tjera ndikimesh të papërshtatshme, por edhe llogari dhënie më të madhe. Sistemi i ri i drejtësisë siguron ndjekje penale më të mira dhe dhënia fund e pandëshkueshmërisë për korrupsionin e nivelit të lartë dhe krimin e organizuar. Këtë vit po punojmë nëpërmjet programit të Partneritetit Nju Xhërsi/ Shqipëri për të identifikuar 35 prokurorë dhe hetues nga Nju Xhërsi dhe federalë për t’u trajnuar mbi legjislacionin e ri penal shqiptar. Nga fillimi i vitit 2020, prokurorët amerikanë do të ofrojnë trajnim për SPAK mbi çështje të tilla si lufta ndaj korrupsionit, pastrimit të parave, trafikimit të njerëzve”, thuhet në reagimin e SHBA. /Elisjeda Kiko
