Çdo ditë që kalon drejt zgjedhjeve të 25 prillit, aq më shumë shtohet presioni amerikan ndaj Bashës mbi kandidimin e Sali Berishës.
Prej disa muajsh, PD zien nga debatet nëse Berisha duhet të futet në listën e kandidatëve apo jo. Genc Ruli ka qenë i vetmi që e ka thënë hapur se ai nuk duhet të jetë deputet, pasi nëse kandidon e dëmton akoma dhe më shumë Bashën. Berisha nga ana tjetër nuk tërhiqet, ndërsa duket se në lojë kanë hyrë dhe amerikanët.
Gazeta e tha disa muaj më parë se Bashës i është bërë e qartë se Berisha nuk duhet të jetë më në politikë, ndërsa ditët e fundit presioni ndaj tij është shtuar hapur. Berisha shihet si armiku kryesor i reformës në drejtësi dhe historia ka treguar se ata që duan rrëzimin e reformës nuk i kanë aspak mirë raportet me amerikanët.
Rasti i Adriatik Llallës e tregon fare qartë. Basha është vendosur mes dy zjarreve, por 20 ditët e fundit ka pasur 3 mesazhe të forta të dhëna nga ambasada e SHBA, çka tregon se simpatia e tyre për ish-kryeministrin nuk është dhe aq e madhe.
Mesazhi i parë ishte më 11 dhjetor. Në këtë datë protestat për vrasjen e Klodian Rashës kishin arritur kulmin dhe Berisha i hidhte benzinë dhunës. Ambasada doli me një reagim, i cili dukej qartë që shkonte për të.
“Ata që kanë qenë në pushtet më parë nuk duhet të përkeqësojnë gabimet e së kaluarës, duke sugjeruar se dhuna është e pranueshme. Ambasada e Shteteve të Bashkuara u bën thirrje të gjitha palëve të tregojnë përmbajtje, në përputhje me përgjegjësitë e tyre, në mënyrë që të drejtat e të gjithë qytetarëve shqiptarë të mbrohen dhe që zërat e tyre, përfshirë atyre në protestë, të kenë mundësi të shprehen dhe të dëgjohen pa dhunë”, tha ambasada.
Por pati një mesazh dhe për Bashën se ka ardhur koha të distancohet nga Berisha: “Ata që kërkojnë të jenë në pushtet duhet të shfaqin aftësinë e tyre për të udhëhequr në një mënyrë të përgjegjshme, përfshirë edhe duke refuzuar dhunën”.
Takimi
Sinjali i dytë kundër Berishës erdhi më 19 dhjetor. Në mbrëmje ambasadorja pati një darkë me liderin demokrat Lulzim Basha, ku përveç problematikave aktuale është folur dhe për listën e kandidatëve që duhet të jenë në zgjedhjet e 25 prillit.
Vetë Basha ishte në një intervistë të hënën ku refuzoi të jepte detaje nga takimi, çka shton zërat që qarkullojnë në korridoret e politikës se amerikanët ja kanë bërë të qartë se Berisha është kërcënim serioz nëse hyn sërish në Parlament.
Mesazhi i fundit
Ndërsa mesazhi më i fundit ishte ditën e hënë. Edhe pse kaloi në heshtje në media, ambasadorja përmes Tuiterit kërkoi të ndalen presionet ndaj Komisionit të Pavarur të Kualifikimit.
Po të hënën ishte Berisha që sulmoi kryetaren e KPK. Mesazhi i saj dukej se ishte për ish-kryeministrin, duke dëshmuar dhe një herë se sulmet e tij ndaj reformës amerikanët nuk i tolerojnë aspak.
Basha mes dy zjarreve
Qëndrimet e fundit të amerikanëve duket se janë të qarta. Ata nuk është se duan Berishën. Dëshmia më e fortë është se Yuri Kim nuk e ka takuar asnjëherë. Çdo ambasador i SHBA dhe BE që vinte në Tiranë shkonte një herë në zyrën e Berishës, më pas te Basha.
Madje Donald Lu para se të ikte i shkoi në zyrë Berishës. Yuri Kim nuk e ka takuar asnjëherë, duke treguar qartë se për amerikanët ai është i padëshiruar. Rama në Parlament kohë më parë dha sinjale se i është bllokuar viza, ndërsa lëvizjet e fundit e konfirmojnë akoma dhe më shumë.
