Reforma në drejtësi duket se ka filluar t’i shqetësojë të gjitha kategoritë e zyrtarëve. Në 2016 kishte shumë skeptikë, pasi nuk e mendonin se do të vinte vërtet dita që të hetoheshin pushtetarët e korruptuar. Por ndërkombëtarët nga dita në ditë po çojnë mesazhe se nuk do të ketë më asnjë tolerim.
Ajo që pritet të fundosë me dhjetra emra është pasuria. Gabimi që kanë bërë ndër vite deputetë, ministra dhe funksionarë të lartë është se kanë deklaruar të gjithë pasurinë, ku në disa raste arrin në miliona euro. Një pjesë e madhe së fundmi e kanë kuptuar këtë gjë dhe kanë nisur tentativat të fshehin pronat dhe llogaritë bankare.
Sipas ndryshimeve ligjore, mjafton një shkrim mediatik që SPAK të nisë hetimet për pasurinë e një zyrtari, e për këtë arsye plot 113 zyrtarë të lartë, përfshirë deputetë, ish-deputetë, ish-ministra, kryetarë bashkie e drejtorë të lartë kanë fshehur pasuritë gjatë vitit 2019. Gazeta ju drejtua me një kërkesë Inspektoratit të Lartë të Deklarimit të Pasurive për të kërkuar informacion se sa është numri i funksionarëve të kallëzuar gjatë vitit që po lëmë pas.
“Për periudhën janar-tetor 2019, janë paraqitur rreth 101 raste referimesh, ndërsa deri në dhjetor 2019 janë 12 raste të tjera, pra në total, janar-dhjetor 2019 janë 113 raste referimesh”, thuhet në përgjigjen e ILDKPI. Pra nëse shihet me kujdes, në 2 muajt e fundit kanë qenë plot 12 raste, në një kohë kur këtë muaj do konstituohet SPAK. Duket qartë se ka shumë nga ata që do fundosen nga pasuria dhe kanë nisur manovrat për të fshehur vila, apartamente e llogari bankare, por që nuk ja kanë dalë dot.
Masat administrative
Përveç kallëzimeve penale të dorëzuara në prokurori dhe referimeve në polici apo te Drejtoria e Pastrimit të Parave, ILDKP ka vendosur dhe gjoba për ata që kanë refuzuar të deklarojnë pasuritë. “Në total për periudhën 2014-2018 rezulton të jenë aplikuar 1.812 masa administrative “gjobë”. Për periudhën janar-dhjetor 2019, janë aplikuar 52 masa administrative “gjobë”. Për t’u theksuar është fakti, se të gjitha masat administrative të vendosura nga Inspektorati i Lartë janë lënë në fuqi nga gjykatat administrative, me përjashtim të një numri të pakonsiderueshëm, për të cilat gjykata ka vendosur shfuqizimin ose ndryshimin e tyre”, thuhet në përgjigjen e ILDKP për gazetën “SOT”. Më tej bëhet e ditur se ILDKPKI për periudhën 2014 – 2018 ka sanksionuar me masë administrative “gjobë” në total rreth 1.672 zyrtarë si dhe ka aplikuar 140 masa administrative me “gjobë” në kuadër të ligjit nr. 60/2016 “Për Sinjalizimin dhe Mbrojtjen e Sinjalizuesve”.
Dështimi i prokurorisë
ILDKP çdo vit dërgon për hetim me qindra zyrtarë, përfshirë dhe deputetë e ish-ministra, por problemi qëndron te organi i akuzës. Deri më sot prokuroria nuk ka dërguar në gjykatë asnjë dosje për personalitete. Të vetmit që janë hetuar kanë qenë drejtorë drejtorie edhe pse ILDKP ka kapur deputetë me shkelje. Vitin që lamë pas u kallëzuan plot 7 deputetë për fshehje pasurie dhe askush nuk ka shkuar në gjykatë. Nga ana tjetër favori është se institucionet fshehin identitetin. Duke u bazuar te ligji për privatësinë, ka shumë zyrtarë që janë në shkelje flagrante po emrat nuk dalin në media. Duke mos u bërë publike, dosjet përfundojnë në arkiva dhe jo në gjykatë. /Kliti Topalli
