Avokati i njohur Spartak Ngjela paralajmëron se shumë shpejt, Ilir Meta do të dalë para drejtësisë shqiptare. Për Ngjelën, Meta është në hall dhe këtë e tregojnë veprimet e tij të fundit.
“Meta po bëhet qesharak ditë e për ditë e më shumë. Ai tani kuptohet se është në hall, por nuk e kalon dot. Ka bërë shkelje të rënda që kanë prekur jo vetëm Shqipërinë. Nuk besoj se do të vonojë akuza e ngritur kundër tij në SPAK”, shkruan ai.
Sipas Ngjelës, treshja e lartë e SPAK-ut që ndodhet sot në Uashington, pritet të sjellë në Shqipëri fillimin e goditjes çliruese të shqiptarëve: fillimin e procesit penal kundër korrupsionit të lartë shtetëror në Shqipëri. Si po sillen të korruptuarit e lartë në Tiranë, pasi kanë parë këtë ngjarje lëvizëse të krerëve të SPAK-ut drejt Uashingtonit? Më i shthururi është Ilir Meta. Ai ka filluar individualisht “luftën kundër korrupsionit”.
Por e gjithë kjo lëvizje antikorrupsion që duket se po bëhet nga Meta ka, brenda saj, doza frike dhe vonese njëherësh. Kjo sepse ky ka qenë President i Republikës së Shqipërisë deri para një jave, dhe, si president, Meta nuk ka folur asnjë fjalë kundër korrupsionit. Dhe jo vetëm kaq, por dihet botërisht që Ilir Meta ka qenë kundër reformës në drejtësi.
Madje, pasi nuk e bllokoi dot shumicën e cilësuar në Parlament, për të mos e miratuar ligjin kryesor të reformës antikorrupsion, ai doli si i tërbuar dhe krejtësisht si i degraduar, për të kërkuar konsensusin në miratimin e atij ligji. Por ata që e njihnin, e sidomos ndërkombëtarët, u habitën me këtë fëmijë kaq të trembur nga reforma, e cila po pritet ta shpronësojë tërësisht. Dhe jo vetëm Metën.
Prandaj, na duhet të theksojmë se: treshja e lartë e SPAK-ut që ndodhet sot në Uashington, pritet të sjellë në Shqipëri fillimin e goditjes çliruese të shqiptarëve: fillimin e procesit penal kundër korrupsionit të lartë shtetëror në Shqipëri,” përfundoi shkrimin Ngjela.
