Mbledhja e grupit parlamentar të PS ka shënuar një moment acarimi mes kryeministrit Rama dhe ish-ministres së Jashtme, tashmë e larguar nga pothuajse të gjitha funksionet politike, Elisa Spiropali.
Burime nga brenda grupit parlamentar thanë se gjatë mbledhjes është vënë re një sjellje provokuese e vazhdueshme e Spiropalit ndaj kolegëve që kishin radhën për të raportuar. Ajo nuk e ka marrë asnjëherë fjalën qartësisht për të ngritur ndonjë problem, por qeshte dhe fliste me vete. Në një moment i është hakërruar Lorena Goxhibellit, drejtoreshës së ASHK-së, e cila ishte duke raportuar. Më pas ka vijuar provokimet edhe ndaj ministres për Marrëdhëniet me Parlamentin, Erjona Ismaili.
Ky duket se ka qenë momenti që ka shkaktuar irritimin e kryesocialistit Rama, i cili, pasi e ka injoruar përgjatë gjithë mbledhjes, nuk ka duruar më dhe ka ndërhyrë furishëm.
Burimet nga mbledhja thanë se Rama i është drejtuar Spiropalit me fjalët: “Mbylle gojën dhe mos fol më fare, përndryshe do të të nxjerr vetë jashtë.” Deputetët socialistë kanë mbetur të habitur nga sjellja e paprecedentë e Elisa Spiropalit, e cila nuk dukej të ishte shumë e qetë nga ana mendore.
Deputetë socialistë thonë se tashmë, pas rreth një viti në dy pozicione të rëndësishme, 6 muaj si kryetare e Parlamentit dhe 5 muaj si ministre e Jashtme, Elisa Spiropali ka filluar të sillet çuditshëm në mbledhjet e grupit parlamentar: flet dhe shan nën dhëmbë, qesh edhe kur të tjerët flasin dhe detyron Ramën të vendosë rregull.
Duken kohë të vështira për Spiropalin, e cila në mbledhjen e fundit të Asamblesë socialiste u shkarkua edhe si drejtuese politike e Kavajës, pasi mori në këtë zonë një nga rezultatet më të dobëta zgjedhore të viteve të fundit.
Duket se pretendimet e saj fillestare për të bërë politikë të madhe janë zbehur dukshëm, duke çuar në këtë rënie drastike në hierarkinë politike të PS-së, çka po shkakton një stres të madh dhe të vështirë për t’u përballuar për znj. Spiropali.
