Një mundësi për të ulur tensionet dhe për të shmangur një luftë rajonale duket se po hapet. Media amerikane Axios raporton se të premten pritet një takim i nivelit të lartë mes Shteteve të Bashkuara dhe Iranit në Stamboll.
Temë kryesore e këtij takimi do të jetë programi bërthamor i Teheranit. Shtetet e Bashkuara do të përfaqësohen nga i dërguari i Trump për Lindjen e Mesme, Steve Ëitkoff, ndërsa Irani nga ministri i Jashtëm Abas Aragçi. Burime nga Shtëpia e Bardhë thonë se ky është momenti më i mirë për të arritur një marrëveshje që mund të shmangë një sulm ushtarak amerikan.
Nëse gjithçka shkon sipas planit, ky do të jetë takimi i parë i drejtpërdrejtë mes palëve që nga dështimi i negociatave të qershorit të kaluar. Ai dështim çoi në luftën 12-ditore Izrael–Iran. Administrata Trump kërkon që çdo marrëveshje të përfshijë jo vetëm çështjen bërthamore, por edhe arsenalin raketor dhe aleatët rajonalë.
Ndërkaq, Irani insiston që të diskutohet vetëm programi bërthamor. Në prapaskenë, diplomacia turke, egjiptiane dhe e Katarit ka punuar intensivisht për këtë takim. Para se të shkojë në Stamboll, Ëitkoff do të vizitojë Izraelin për takime me kryeministrin Netanyahu dhe ushtrinë izraelite. Pastaj ai do të shkojë në Abu Dabi për bisedime trepalëshe mes Rusisë dhe Ukrainës. Ky itinerar përgatit terrenin për bisedimet me Iranin dhe mund të jetë një hap i rëndësishëm drejt paqes.
