Kanë kaluar 30 vjet që nga zhdukja e Remzi Hoxhës. Djali i tij, Ardian Hoxha, ka bërë një përkujtim prekës në rrjetet sociale, duke shprehur dhimbjen dhe shpresën që thotë se nuk ka humbur.
“Tridhjetë vjet heshtje nga shteti shqiptar, tridhjetë vjet kërkimi dhe shprese që kurrë nuk është shuar. Mungesa e tij është bërë një prani më vete, një jehonë e qetë në çdo çast të jetës sonë deri në frymën e fundit.”
Ai tha se edhe pse trupi i babait të tij pushon diku i panjohur, shpirti i tij jeton në forcën që la, në guximin dhe të vërtetat që ende presin të dalin në dritë.
Ardian theksoi se beson se një ditë e vërteta do të dalë nga hija dhe Ramiz Hoxha do të ketë mundësinë të prehet si hero, jo si viktimë.
“Deri atëherë, e mbajmë kujtimin e tij si busullën tonë, dashurinë e tij si dritën që na udhëheq. Ne ende vazhdojmë ta kërkojmë, ende presim dhe ende jemi krenarë. Lavdi për ty babi im i dashur, krenari e kombit tonë,” shkruan Ardian Hoxha.
Biznesmeni Remzi Hoxha më 21 tetor 1995 ishte rrëmbyer në vendin e tij të punës në Shqipëri dhe zhdukja e tij paraqet një nga ngjarjet më misterioze në vitet e demokracisë së shtetit shqiptar.
Shumë qeveri kanë ndryshuar në Shqipëri që nga zhdukja e biznesmenit, por asnjëra nuk ia ka dalë të nxisë drejtësinë për fatin e Hoxhës.
