UEFA përjashtoi me 10 vite nga të gjitha kompeticionet europiane skuadrën e Skënderbeut, por mesa duket, inati i tyre me klubin korçar është më i thellë se një dënim për ndeshje të dyshimta.
Megjithëse korçarët u shpallën kampion këtë sezon në Kategorinë Superiore, ku në fushë nuk e vunë në diskutim asnjë moment diktatin e tyre, UEFA është e sigurt që titullin e ka fituar Kukësi.
Në fakt, pjesëmarrja e Kukësit në Ligën e Kampionëve, i ka bërë konfuzë drejtuesit e UEFA-s, pasi aty duhet të ishte skuadra kampione.
Megjithatë, ishte vetë UEFA ajo që dënoi Skënderbeun dhe duhet të dijë se Kukësi nuk po luan në Europë si skuadra që është renditur e para, shkruan “Vipsport”.
Në njoftimin që UEFA ka bërë në sajtin zyrtar për ndeshjen mes Kukësit dhe Karabakut, shkruhet: Kukësi, kampion i Shqipërisë do të përballet me kampionin e Azerbaixhanit, Karabakun.
Kjo nuk është hera e parë që UEFA e konsideron Kukësin kampion në Shqipëri, duke qenë se edhe në njoftimet e tjera, verilindorët janë “shpallur” kampion nga ky institucion, i cili duhet të ndërhyjë në staf, për të marrë njerëz më të përgjegjshëm.
