Trupi gjykues i Kolegjit të Posaçëm të Apelimit vendosi dje të çelë hetimit gjyqësor për prokurorin e Apelit të Shkodrës Arben Dollapaj, me kërkesë të Komisionerit Publik. Në seancën e zhvilluar dje, trupa gjykuese e KPA gjithashtu pranoi si provë të gjithë aktet e depozituara në seancën e 4 dhjetorit nga subjekti i rivlerësimit.
Trupi gjykues vendosi të kërkojë nga institucionet shtetërore dokumentacion shtesë në funksion të hetimit pasuror: nga ZVRPP Tropojë, nga Bashkia Tropojë, nga ministria përgjegjëse për Turizmin, nga Drejtoria Rajonale Tatimore Kukës, nga Ministria e Drejtësisë, nga Prokuroria pranë Gjykatës së Shkallës së Parë Tiranë, Prokuroria pranë Gjykatës së Shkallës së Parë Durrës, si dhe nga Prokuroria e Përgjithshme. Këtë dokumentacion, trupi gjykues e konsideroi të nevojshëm për çështjen. Trupa gjykuese pak para përfundimit të seancës, i kërkoi Komisionerit që seancën e radhës, e cila do të mbahet më 16 janar, të bëjë të ditur qëndrimin e tij në lidhje me ankimet e bëra nga publiku, ndërsa prokurori duhet të paraqesë çdo provë që e konsideron të nevojshme në funksion të shqyrtimit të çështjes.
Arben Dollapaj u konfirmua në shkallën e parë në 2018, por pak muaj pasi IKP vendosi ta ankimojë, duke arsyetuar se hetimi për të nga KPK nuk ishte i plotë, që sipas Komisionerit, faktet dhe provat e administruara në përfundim të këtij hetimi administrativ janë të pamjaftueshme për të mbështetur vendimin e marrë për të.
Kërkesa e Komisionerit
Kërkesa e Komisionerit Publik dje u fokusua tek hetimi për lejen e ndërtimit të banesës në Valbonë. Gjatë seancës së zhvilluar dje, Komisioneri Publik tha se ka shqyrtuar provat e dorëzuar nga prokurori Dollapaj në seancën e 4 dhjetorit dhe për këtë ai arriti në përfundimin se duhet të verifikohet nëse prokurori ka përfituar kredi sipas kushteve ligjore. “Kërkojmë hetim për një banesë në bashkëpronësi të Dollapajt në Valbonë, verifikimin e lejes së ndërtimit dhe cilësimin si persona të lidhur të vëllait dhe motrës së subjektit për shkak se janë bashkë-investitorë. Në seancën e kaluar, subjekti paraqiti 10 prova. Dollapaj ka pretenduar se godina shërben pjesërisht si “guest house”, pasi një pjesë e saj ende nuk është rregulluar dhe kompletuar.
Rezultojnë disa vlera të ndryshme për këtë pasuri”, deklaroi komisioneri. Sipas tij, nuk identifikohet emri i personit që ka realizuar investimin dhe vlera totale e tij. Komisioneri u shpreh se i qëndron kërkesës se duhet administruar nga Bashkia Tropojë dokumentacioni i plotë tekniko ligjor për zhvillimin e pronës në fjalë, për evidentimin e saktë të destinacionit; verifikimin e numrit të kateve; lejen e investimit të kryer; hetimi i të ardhurave që kanë shërbyer për investimin. “Në lidhje me një kredi me kushte lehtësuese e përfituar nga subjekti në 2011, rezulton se në momentin që është lëvruar kredia ka pasur dy kate të banesës së tij. Mbetet për t’u verifikuar nëse ka përfituar kredi sipas kushteve ligjore”, thuhet në relacionin e IKP. Komisioneri Publik më herët në seancën e shkuar, kërkoi që të hetohen edhe personat e tjerë të lidhur me të. Kjo kërkesë nuk u kundërshtua nga anëtari i KLP-së. Kujtojmë që Dollapaj që në përballjen e parë me KPA-në ishte dakord me kërkesën e Komisionerit, duke kërkuar edhe ai riçeljen e hetimeve. /Ornela Çelpica
