Interi ka marrë sot një fitore thellë në kampionat. Zikaltrit janë argëtuar me Bolonjën, duke e mposhtur me rezultatin 6-1.
Miqtë ishin të parët që kaluan në avantazh me anë të Orsolinit në minutën e 22-të, por më pas do u duhej të numëronin golat e ekipit të Inzagit. Edin Xheko barazon shifrat vetëm 4 minuta më vonë me një gol spektakolar në stilin e Zidanit.
Brenda pjesës së parë Interi gjen golin edhe dy herë të tjera. Fillimisht Dimarko shënon nga goditja e dënimit në minutën e 36, ndërsa në të 42-tën Lautaro Martinezi i çoi shifrat në 3-1.
Pjesa e dytë nis po atje ku u mbyll e para për Interin, në sulm. Në minutën e 48 Dimarko shënon përsëri në portën e Bolonjës, ndërsa në minutën e 59 Çalhanoglu tregohet i saktë nga pika e bardhë e penalltisë. Në listën e golashënuesëve përfshihet edhe Gosensi, i cili fikson shifrat në 6-1 në minutën e 76 të ndeshjes.
Në minutën e 71-të Inzagi vendos t’i japë hapësirë edhe Kristjan Asllanit, që këtë herë flirton më shumë se çdo herë tjetër me golin. Mesfushori shqiptar kërcënon portën e Bolonjës, por në fund ndalet nga shtylla. Gjithsesi Interi merr tre pikët kundër Bolonjës, duke u renditur në vendin e 4-t në Serinë A me 27 pikë të grumbulluara.
Pas përfundimit të ndeshjes, Inzagi ka folur për mikrofonin e “DAZN”-it, ku ndër të tjera është pyetur edhe për dyshen Asllani-Galjardini. Trajneri i Interit ka pranuar se të dy janë zgjedhje të vështira për të.
“Asllani dhe Galjardini? Nuk është kurrë e lehtë për ne trajnerët. Ne bëjmë zgjedhje çdo ditë. Dy të listuarve u mungojnë shtatë-tetë që më kanë vënë gjithmonë në vështirësi. Kemi luajtur 20 ndeshje, 18 pa Lukakun dhe 14 pa Brozoviçin, dy pengje shumë të rëndësishme për ne. Na kanë munguar, por falë të gjithëve kemi bërë një rrugëtim të mrekullueshëm në Champions. Në ligë kemi humbur disa pikë që na lëndojnë, por tani duhet ta transferojmë atë që bëjmë në ‘San Siro’ në fushat e jashtme”, ka deklaruar Simone Inzagi.
