Mbi 1.4 milion euro ka shpenzuar Partia Demokratike e Sali Berishës për të paguar konsulencën amerikane gjatë zgjedhjeve të 11 majit. Partia Demokratike dorëzoi sonte në KQZ raportin për shpenzimet e fushatës.
Chris Lacivita është paguar tre herë nga PD. Pagesën e parë prej 48.200.000 lekësh konsulenti amerikan e ka marrë më 31 janar 2025.
Pagesa e dytë për kompaninë “Advancing Strategies” e konsulentit LaCivita me vlerë 45.950.000 lekë është bërë më 14 mars 2025.
Pagesa e tretë për konsulentin elektoral LaCivita me vlerë 43.500.000 lekë është bërë më 29 prill 2025.
Po ashtu, Partia Demokratike ka paguar 5.498.400 lekë kompaninë amerikane Fabrizio, Lee&Assoccites, e cila i përket Anthony Fabrizio, bashkëpunëtor i LaCivita. Fabrizio është paguar për një sondazh.
Siç shihet edhe nga datat e lëshimit të faturave, LaCivita i ka marrë të gjitha pagesat paradhënie. Pagesa e parë ëshrë bërë më 31 janar të vitit 2025, ndërkohë ai u prezantua më 10 shkurt, dhe e fundit është bërë më 29 prill 2025, 13 ditë para zgjedhjeve.
Partia Demokratike në zgjedhjet e 11 majit ka shpenzuar në total 227,150,138 lekë, ose mbi 2.3 milionë euro.
Totali i të ardhurave nga fondet publike 44,818,545 lekë ose 463,550 euro
Nga vetë partia 171,010,474 lekë ose 1,768,730 euro
Individë 9,921,118.755 lekë 102,612 euro
Nga persona juridikë 1,400,000 lekë ose 14,497 euro
Dy prej donatorëve më të mëdhenj janë Shpresa Breçani dhe Eda Grimci, përkatësisht me nga 800,000 lekë dhe 600,000 lekë të dhuruara për PD.
As shifra e majme për arkitektin e fitores së Trump, LaCivita nuk e ndihmoi Berishën të kthehet në pushtet, i cili pësoi një disfatë të thellë në zgjedhjet parlamentare të 11 majit duke u rrudhur në 50 deputetë. LaCivita është shfaqur disa herë krah Berishës gjatë fushatës së 11 majit dhe është përfshirë edhe në replika në distancë me kryeministrin Edi Rama.
Prej gati 6 muajsh, kreu i PD është përpjekur ta fshehë shifrën e kontratës me LaCvita duke iu shmangur përgjigjeve të gazetarëve. Berisha thotë se vetë nuk ka paguar asnjë para nga xhepi, por shpenzimet personale për fushatën ia ka mbuluar Partia Demokratike.
LaCivita u prezantua më 10 shkurt nga Berisha dhe ka marrë pjesë në disa mitingje të Partië Demokratike gjatë 11 majit, por shfaqjet e tij ishin të rralla. LaCivita ka marrë pjesë në disa mitingje të Partisë Demokratike gjatë 11 majit. Por, teksa për LaCivitan do të zbulohet kontrata, e paqartë është ende se si Berisha solli në Tiranë për fushatë Paul Manafort, një njeri i akuzuar në SHBA për lidhjet me Kremlinin, që ka bërë evazion fiskal, që ka pastruar para, ka bërë mashtrime bankare, ka kërcënuar dëshmitarë, ka gënjyer në dëshmi apo edhe krime të tjera federale. Në shkrimet e mediave amerikane flitet se Manafort u rekrutua nga LaCivita për fushatën e PD-së.
Për LaCivitan dhe Manafort është ‘kujdesur’ edhe Fatmir Mediu, i cili sipas raportit që ka depozituar në KQZ, u ka paguar secilit nga 1100 euro faturë për akomodim në një hotel në Tiranë, ndërsa konsulenti LaCivita ka përfituar edhe një masazh indian.
