Ikona italiane e blues, rock dhe soul, Zucchero, do të mbajë një koncert live në Tiranë më 21 korrik 2026, në Pistën Olimpike të Vrapit, në kuadër të turneut “Overdose D’Amore Gold – World Tour 2026”.
Lajmi është bërë i ditur nga ministri i Turizmit, Kulturës dhe Sportit, Blendi Gonxhja, përmes një postimi në Instagram.
“Zëri, shpirti dhe këngët që i njohim të gjithë”, shkruan Gonxhja, ndërsa ndan njoftimin për koncertin e artistit italian në Tiranë.
“Blues, rock & soul – një natë me muzikë shpirti”, thuhet në prezantimin e koncertit të Zucchero-s, i cili konsiderohet një nga zërat më të dashur dhe më të njohur të muzikës italiane në botë.
I njohur për interpretimin e tij të fuqishëm dhe atmosferën që krijon në skenë, Zucchero ka performuar në arenat dhe skenat më prestigjioze ndërkombëtare, duke bashkëpunuar me artistë legjendarë si Eric Clapton, Sting, Bono, Andrea Bocelli, Brian May dhe Luciano Pavarotti.
Artisti pritet të sjellë në Tiranë këngët klasike dhe hitet e tij më të njohura në një performancë që organizatorët e cilësojnë si të paharrueshme. A.K./TemA
