Interi është finalisti i parë i Kupës së Italisë. Zikaltërit e Cristian Chivu përmbysën 3-2 Comon të martën në ‘Giuseppe Meazza’ dhe do kërkojnë trofeun e dhjetë në këtë kompeticion.
Miqtë nga Como morën epërsinë 0-2 me golat e Baturinës dhe Da Cunha në minutat 32 dhe 48-të, para se Interi të bënte përmbysjen e madhe. Fillimisht Calhanoglu shkurtoi shifrat në minutën e 69-të pas asistit të Sucic, por spektakli dhe emocionet ishin lënë për në minutat e fundit.
Katër minuta para fundit, sërish Sucic asistoi për Calhanoglu dhe turku ia doli të barazonte rezultatin 2-2 për dopietën personale. Me ndeshjen që i drejtohej shtesës, kroati Sucic bëri heroin dhe shënoi në minutën e 89-të, me Calhanoglu që i ktheu ‘borxhin’ duke i dhënë asistin final.
Festë zikaltër për një mbrëmje shumë emocionuese në Milano, ndërsa Interi bëhet finalisti i parë i Kupës së Italisë dhe pret sot të mësojë kundërshtarin që do dalë nga çifti Lazio – Atalanta, me ndeshjen e parë që është mbyllur 2-2.
