Kryeministri i sapozgjedhur i Hungarisë, Peter Magyar, ka paralajmëruar fundin e praktikës së dhënies së azilit për politikanë të akuzuar apo të dënuar, duke kritikuar drejtpërdrejt vendimet e qeverisë së mëparshme të Viktor Orban.
Ai kritikoi ashpër vendimet e qeverisë së mëparshme të Viktor Orban për t’u dhënë azil figurave të kontestuara politike, duke përmendur rastin e ish-kryeministrit të Maqedonisë së Veriut, Nikola Gruevski, i dënuar në vendin e tij dhe i strehuar prej vitesh në Budapest.
“Epo, mendoj se fola shumë qartë për këtë më parë, se sugjerova që të mos blejnë mobilje në Hungari nga IKEA sepse nuk do të qëndrojnë gjatë. Hungaria nuk do të jetë një strehë për kriminelët ndërkombëtarë. Dhe kjo nuk vlen vetëm për ta, por edhe për z. Nikola Gruevski, ish-presidentin e Maqedonisë së Veriut, i cili është gjithashtu një i dënuar. Por nuk është për shkak se kjo është e drejtë që ne presim që edhe vendet e tjera evropiane, nëse kriminelët politikë hungarezë ikin në vende të tjera, t’i ekstradojnë përsëri tek ne, në frymën e bashkëpunimit evropian, këta kriminelë të mundshëm”, deklaroi Magyar.
Ai iu referua gjithashtu edhe rasteve të politikanëve polakë Zbigniew Ziobro dhe Marcin Romanowski, duke theksuar se ata duhet të përballen me drejtësinë në vendin e tyre. Në të njëjtën kohë, Magyar u bëri thirrje që, nëse nuk kanë asgjë për të fshehur, të kthehen në Poloni dhe të pastrojnë emrin përpara institucioneve dhe publikut. Sipas tij, nëse ndodhen ende në Hungari, do të kërkohet një mënyrë për ekstradimin e tyre.
Deklaratat e tij sinjalizojnë një kthesë të fortë nga politika e ndjekur nga Viktor Orban, gjatë së cilës Hungaria u kthye në një strehë të diskutueshme për figura politike në konflikt me drejtësinë, veçanërisht në Ballkan.
Rasti i Gruevskit mbetet precedent kyç në rajon, ndërsa zhvillimet e fundit pritet të ndikojnë edhe në perceptimin e Hungarisë si një “portë” e mundshme azili.
Edhe në Shqipëri, emri i Hungarisë është përmendur shpesh në këtë kontekst. Në diskursin publik është aluduar se ish-presidenti Ilir Meta, përpara arrestimit, mund të ketë kërkuar një mundësi të tillë, ndonëse kjo nuk është konfirmuar zyrtarisht.
Ndryshimi i kursit në Budapest mund të mbyllë një nga destinacionet kryesore për politikanët që synojnë t’i shmangen drejtësisë, duke rritur presionin për përballje me ligjin në vendet e tyre./ Pamfleti
