Izraeli po përgatitet për një tjetër cikël zgjedhor të parakohshëm, pas vendimit të kreut të koalicionit qeverisës për të paraqitur zyrtarisht projektligjin për shpërbërjen e Knessetit (Parlamentit). Ky hap shënon fundin e parakohshëm të mandatit aktual, i cili ishte parashikuar të përfundonte me zgjedhjet e rregullta të 27 tetorit.
Sipas mediave izraelite, projektligji i paraqitur sonte nga udhëheqësi i koalicionit të kryeministrit Netanyahu do të nisë udhëtimin parlamentar javën e ardhshme. Vendimi vjen si pasojë e një krize të brendshme që ka tronditur themelet e aleancës qeverisëse, e nxitur nga mosmarrëveshjet e thella mbi ligjin e rekrutimit ushtarak.
Shkaku i krizës, ligji për rekrutimin
Shtysa kryesore për këtë lëvizje dramatike ishte njoftimi i djeshëm i njërës prej partive ultra-ortodokse të koalicionit, e cila deklaroi qëllimin për të votuar mosbesimin ndaj qeverisë. Shkak u bë dështimi në arritjen e një marrëveshjeje për ligjin që rregullon shërbimin ushtarak për të rinjtë ultra-ortodoksë, një çështje kjo mjaft e ndjeshme në shoqërinë izraelite.
Protesta e partive fetare brenda koalicionit e bëri të pamundur mbajtjen e shumicës parlamentare, duke e detyruar Netanyahun të pranojë shpërbërjen e parakohshme për të shmangur një rrëzim poshtërues përmes mocionit të mosbesimit.
Ndonëse procesi parlamentar nis javën që vjen, data e saktë e votimit për shpërbërjen përfundimtare ende nuk është planifikuar. Diskutimet për datën e re të zgjedhjeve do të zhvillohen gjatë debateve në komisionet parlamentare.
Burimet zyrtare bëjnë me dije se zgjedhjet pritet të mbahen në një hark kohor mes 1 shtatorit dhe 27 tetorit, duke e lënë vendin në një gjendje pezullimi politik gjatë muajve të verës.
Kjo lëvizje vjen në një moment mjaft delikat për Izraelin, duke shtuar pasigurinë politike në një kohë kur vendi po përballet me sfida të mëdha të sigurisë dhe ekonomisë në rajon.
