Policia që iu përgjigj raportimeve për të shtëna me armë në një dyqan tingëllon si fillimi i shumë filmave amerikanë të zhanrit aksion, por efektivët në Nebraska gjetën një fajtor të pazakontë: një qen.
Stacioni lokal televiziv KNOP News 2 raportoi se policia e Scottsbluff u thirr së fundmi në një dyqan pranë një pike karburanti pas raportimeve për të shtëna.
Kur mbërritën në vendngjarje, ata gjetën një kamionçinë me dëmtime nga plumbat në njërën nga dyert dhe një grua që ishte goditur në krah nga një fishek arme gjahu.
Megjithatë, hetimi tregoi se shkaku i së shtënës ishte një qen. Pronari i automjetit ku ndodhej qeni kishte hyrë në një dyqan pranë stacionit të karburantit, duke e lënë armën brenda. E shtëna ndodhi ndërsa qeni po lëvizte nga njëra anë e sediljes së pasme në tjetrën.
Disi, qeni kishte shkaktuar shkrepjen e armës së gjahut, e cila kishte një fishek të gatshëm në dhomëz duke dëmtuar automjetin dhe goditur kalimtaren.
Ajo u dërgua në spital, megjithëse nuk kishte plagë serioze.
Në Nebraska është e paligjshme të ngasësh një automjet me një armë gjahu të mbushur brenda tij.
