“Krushqi” në opozitë, Ermal Hasimja: Si i bëra bashkë Berishën, Lapajn dhe Dash Shehin”Tym i bardhë në opozitë”. Kështu është konsideruar pakti i ri që ka nisur mes disa aktorëve politikë.
Drejtuesi i Forumit për Dialogun Politik, Ermal Hasimja, ka dhënë detaje mbi marrëveshjen mes Partisë Demokratike, “Shqipëria Bëhet” dhe LZHK, lidhur me reformën zgjedhore.
Në një lidhje live në emisionin “Off the Record” në A2 CNN me Andrea Dangllin, Hasimja u shpreh se palët kanë arritur dakordësi për pikat kryesore, ndërsa diskutimet vijojnë për disa çështje të tjera.
Ai tha nga propozimet kryesore është ndryshimi i sistemit zgjedhor në proporcional kombëtar, ku e gjithë Shqipëria do të konsiderohej si një zonë e vetme zgjedhore.
“Është rënë dakord në parim me pikat më të rëndësishme, në radhë të parë për një qëndrim të unifikuar të opozitës për të kërkuar një sistem zgjedhor në formën e proporcionalit kombëtar. Kam pasur një dakordësi të drejtëpërdrejtë me zotin Berisha.
Pra, e gjithë Shqipëria një zonë e vetme zgjedhore, për të hequr qafat e proporcionalit rajonal, që është një sistem skandaloz për Shqipërinë dhe ka prodhuar deformime të papranueshme. Kemi edhe dy parti të tjera opozitare që i kemi ftuar por nuk kanë reaguar”, tha Hasimja.
Hasimja, gjithashtu shtoi se tjetër pikë e rëndësishme e marrëveshjes është rritja e numrit të deputetëve në 140, në kundërshtim me propozimin e Partisë Socialiste për një parlament me 100 mandate.
“Nga ana tjetër, një parlament me 140 deputetë, përkundër propozimit të Partisë Socialiste për një parlament me 100 deputetë, i cili do ta privonte parlamentin nga përfaqësimi i partive të reja dhe të vogla. Gjithashtu, është rënë dakord për lista të hapura në parim”, shtoi Hasimja në Off The Record me Andrea Dangllin.
Ndër të tjera ai tha që ky bashkëpunim përcjell një mesazh për qeverisjen e opozitës si alternativë edhe pse sipas tij duhet të bëjë shumë më tepër.
