Gjatë takimeve të sotme në Berat, Doktorit i ndodhin dy probleme. E para, i dolën njerëz që mbronin Salianjin dhe e dyta, i dolën “budallenj” që mbronin Doktorin. Të dyja ishin shumë të rënda. Muli, i alarmuar, pyet Lelon se si mund t’i shmangin këto dy probleme nga PD.
-Na u nxi jeta sot në Berat! Nuk dimë nga t’ia mbajmë. Na doli një grup që bërtisnin për Salianjin, thua se ai është shpëtimtari i botës, dhe sikur mos mjaftonte kjo, na u hodhën në qafë ca të tjerë që mbronin Doktorin, por flisnin me aq rrokullakë sa na bënë horë! Si t’i shmangim këto dy goditje se na u bë PD-ja si repart psikiatrik dhe gjykatë në ajër?
-Problemi nuk është te njerëzit, është te sinkronizimi.
Atëherë, për rastin e parë, atë të Salianjit, zgjidhja është teknike. Sa herë që të shohim dikë me pankartë për Salianjin, do t’u themi që ai është në një “mision sekret infiltrimi” për të rrëzuar regjimin nga brenda, ndaj takohet me Gjysin. -Kështu ata nuk bërtasin më, por rrinë në heshtje si konspiratorë.
-Po me këta “budallenjtë” tanë që na mbrojnë Doktorin e na bëjnë të skuqemi, çfarë të bëjmë? Ata po na nxjerrin më keq se kundërshtarët!
-Ah, kjo kërkon art, Muli. Nuk do t’i quajmë më “budallenj”. Sa herë që dikush thotë një budallallëk monumental për Doktorin, ti do dalësh e do thuash: “Ja, kjo është gjuha e zemrës, kjo është e vërteta e paçensuruar!”
-Po na bëjnë qesharakë, o Lelo! Na doli Berati si skenë humori.
-Muli, dëgjo mua. Në PD-në e sotme, rreziku nuk vjen nga ata që s’marrin vesh, por nga ata që marrin vesh shumë dhe s’thonë asgjë. Më mirë një budalla që bërtet për ne, sesa një i mençur që na shikon me dyshim. Thjesht herën tjetër, kur të shkojmë diku, t’u japim boritë në dorë. Sa më shumë zhurmë të bëjnë, aq më pak u dëgjohet ajo që thonë!
-T’i lëmë shakatë, tha Muli, por unë e kam ndarë mendjen: këta të Salianjit i kemi në xhep, se fundja janë njerëz të mërzitur që kërkojnë diçka dhe ua gjejmë. Po këta budallenjtë tanë… këta po na hanë kokën!
-E ke kuptuar thelbin. Salianji është si një rrebesh vere – bën zhurmë, lagen njerëzit, por pastaj del dielli dhe harrohet. Por budallai që të mbron me “pasion” është si lagështira në mur; të kalb shtëpinë pa e kuptuar.
-Sot në Berat, njëri prej tyre doli para kamerës dhe tha se Doktori është “shpikësi i rrymës elektrike” dhe se Edi Rama po na vjedh dritat që na i la trashëgim Doktori. Çfarë t’i bësh atij?
-Ka një zgjidhje, tha Lelo. T’i veshim të gjithë budallenjtë tanë me bluza të Salianjit. Kështu, çdo budallallëk që thonë, t’ia faturojmë atij tjetrit. Pastaj kur të flasin ata të Salianjit, të duket sikur i ka futur Doktori. Kështu shpëtojmë.
