Nga Dritan Hila
Është e kotë që të merremi me procesin e rizgjedhjes së Sali Berishës në krye të PD procesi ka qenë i ndershëm dhe i drejtë, dhe rezultati 97%, 100% apo edhe 51% nuk ka pikë rëndësie. Ai proces përpara se të jetë mekanizëm është diagnozë. Është diagnozë së pari për Berishën.
Është njeriu i cili nuk ka lidhje fare me iluminizmin. Çdo udhëheqës normal në demokraci kënaqet dhe ndjehet i plotësuar me ciklin opozitë-pushtet-pension. Zbatimi i këtij cikli, emancipon edhe politikën por edhe elektoratin. Fatkeqësisht Berisha nuk është ajo prerje.
Procesi tregoi që ish ndjekësit fanatikë e kamikazë të tij bëhen iluministë vetëm kur ai i përzë nga vatha e PD. Qershia mbi tortë është një ish drejtues që pas 35 vjetësh e njohu dhe na qenkësh penduar që i kishte shërbyer. Pas ‘97-ës vetëm një idiot nuk e kuptonte kush ishte Berisha. Ata që i shkuan pas ose ishin të tillë ose e bënë thjesht për interesin dhe ambicien e tyre. Por mos të shesin dëngla pasi tregu i dënglave tashmë është i tejngopur.
Dhe së fundmi ishte një test për partinë dhe elektoratin. Të votosh Berishën pas 35 vitesh nuk tregon inteligjencë. Në një komb normal ky udhëheqës do kishte përfunduar në shifra të papërfillshme pas presjes dhjetore në tabelën e KQZ. Socialistët në Hungari, Solidarnos në Poloni, për mos vajtur tek Demokracia Kristiane në Itali, nuk ekzistojnë më. Dhe kishin një të shkuar ku e ku më të lavdishme se rrokopuja ideologjike dhe individuale me emrin PD në Shqipëri. Por sot ato janë shuar sepse nuk i voton kush dhe sepse liderët e tyre e kuptuan që çdo gjë ka kohën e vet. Kurse në Shqipëri Berisha mori në zgjedhjet e fundit 500 mijë vota. Kjo natyrisht që nuk tregon inteligjencë të elektoratit por përkatësi tribale apo tarafi. Asgjë më shumë. Dhe siç thotë Rexhep Qosja, ne jemi një popull i ngecur në histori. Ne nuk dimë të modernizohemi e as të pranojmë mendimin alternativ. Imitojmë historinë por nuk dimë të krijojmë të ardhmen. Nuk dimë të pranojmë të renë dhe as të modernizohemi. Mbajmë iPhone 17 por vazhdojmë me mentalitetin e telegrafit. Kjo është ajo qe duhet të na shqetësojë si komb: Sesi ka mundësi që pas 35 vitesh ende votohet nga një masë e madhe e popullsisë, pavarësisht se nuk thotë asgjë të re dhe qëndrimin në krye të formacionit e ka për hallin e tij dhe më kryesorja çfarë nuk shkon në psikikën e kësaj mase njerëzish e si mund të korrigjohen. Të tjerat janë çështje konsumi ditor./dritare.net
