Parada tradicionale e 9 majit në Moskë pritet të zhvillohet këtë vit me ndryshime të theksuara, duke reflektuar ndikimin e luftës në Ukraine mbi kapacitetet ushtarake ruse.
E njohur si Victory Day Parade, ceremonia që përkujton fitoren e Bashkimit Sovjetik ndaj Gjermanisë naziste në Luftën e Dytë Botërore ka qenë historikisht një demonstrim i fuqisë ushtarake të Rusisë. Por këtë vit, për herë të parë pas gati dy dekadash, në paradë nuk do të shfaqen tanke, artileri apo sisteme raketore.
Ministria ruse e Mbrojtjes ka bërë të ditur se, “për shkak të situatës aktuale operative”, një sërë elementësh tradicionalë do të mungojnë, përfshirë studentët e shkollave ushtarake Suvorov dhe Nakhimov, korpusin e kadetëve dhe kolonat e mjeteve të rënda ushtarake. Këto ndryshime lidhen drejtpërdrejt me sfidat që po hasin forcat ruse në frontin lindor të Ukrainës, ku përballen me rezistencë të fortë dhe vështirësi në avancim.
Në të njëjtën kohë, sulmet e vazhdueshme me dronë nga pala ukrainase ndaj objektivave brenda territorit rus kanë ngritur shqetësime për sigurinë e brendshme. Moska përballet gjithashtu me sfida në rimbushjen e kapaciteteve ushtarake, pas humbjeve të konsiderueshme në rajonin e Donbasit. Megjithatë, pavarësisht reduktimeve, parada do të përfshijë pjesëmarrjen e veteranëve të luftës në Ukrainë, studentëve ushtarakë, njësive detare dhe një demonstrim ajror.
Sipas të dhënave të publikuara nga Ukraina, humbjet ruse që nga fillimi i pushtimit në vitin 2022 arrijnë në mbi një milion të vrarë dhe të plagosur, si dhe mijëra njësi të pajisjeve ushtarake të dëmtuara. Këto shifra nuk janë konfirmuar në mënyrë të pavarur, por organizata analitike Oryx vlerëson se Rusia ka humbur dhjetëra mijëra pajisje të dokumentuara vizualisht.
Ndryshimet në paradën e këtij viti shihen nga analistët si një tregues i drejtpërdrejtë i presionit që lufta po ushtron mbi kapacitetet dhe imazhin ushtarak të Rusisë.
