Aktori dhe diplomati i njohur, Zef Bushati, shkruan për qeverisjen e Edi Ramës.
“Kam kohë që e vërej dhe tashmë nuk më habit më. Edi Rama është pa diskutim një njeri i talentuar, por jo thjesht në kuptimin klasik të fjalës.
Talenti i tij duket se qëndron edhe në përzgjedhjen e njerëzve rreth tij, shpesh “individë të paaftë”, pa formimin e duhur profesional, pa kulturë institucionale dhe pa etikë publike.
Dhe pikërisht këta i emron në poste kyçe në PS, në Parlament, në Qeveri, në Administratë, në Diplomaci, kudo ku vendimet kanë peshë.
Pyetja lind natyrshëm: Pse? Përgjigjja është e thjeshtë, edhe pse e hidhur,…sepse një sistem i mbushur me njerëz të dobët është më i lehtë për t’u kontrolluar.
Nuk sfidojnë, nuk mendojnë ndryshe, nuk kundërshtojnë. Dhe vetëm të shërbejnë. E njëjta logjikë nuk është e panjohur as për Sali Berishën.
Edhe tek ai në PD e Qeveri, përzgjedhja shpesh nuk ka qenë mbi meritën, por mbi bindjen dhe varësinë. Pra nuk është çështje individësh, por thjesht çështje modeli për pushtet, me të cilin “Liderët” kërkojnë të sundojnë, e jo të ndërtojnë.
Dhe në fund mbetet një ironi e hidhur që shumë qytetarë e ndjejnë. Në këtë realitet është më e lehtë “të ngjitesh si i paaftë” sesa “të mbetesh jashtë si i aftë”, shkruan Bushati.
